Pedagogter, kásipkerler, memlekettik qyzmetshiler: Astanada 90 áskerı mindetti áskerı jıynǵa shaqyryldy
ASTANA. KAZINFORM — Elordanyń aýmaqtyq qorǵanys brıgadasynda zapastaǵy 17 ofıtser, 73 serjant jáne qatardaǵy jaýyngerler on kún boıy qarqyndy daıyndyqtan ótedi. Bul týraly Qorǵanys mınıstrliginiń baspasóz qyzmeti habarlady.
Baǵdarlamaǵa taktıkalyq, atys, saptyq, medıtsınalyq jáne ınjenerlik daıyndyq sabaqtary kiredi. Vzvodtar men rotalar quramyndaǵy is-qımyldardy úılestirýge, tótenshe jaǵdaılar kezinde mindetterdi oryndaýǵa, odan basqa ınfraqurylymnyń mańyzdy obektilerin qorǵaýǵa erekshe nazar aýdarylady.
— Áskerı jıyndar — ulttyq qaýipsizdik júıesiniń mańyzdy elementi. Biz áskerı mindettilerdiń qyzmet barysynda alǵan bilimderi men daǵdylaryn ózektendirip qana qoımaı, olardy aýmaqtyq qorǵanystyń zamanaýı talaptaryna sáıkes áreket etýge úıretemiz, — dep atap ótti Astana qalasynyń qorǵanys isteri jónindegi departamentiniń bastyǵy polkovnık Farhat Qurmanǵajınov.
Jıynǵa qatysýshylar túrli maman ókilderi: ınjenerler, júrgizýshiler, pedagogtar, kásipkerler, memlekettik qyzmetshiler. Olardyń bári daıyndyqtan ótý jáne eldiń qorǵanys qabiletin nyǵaıtýǵa úles qosý úshin jumys oryndaryn ýaqytsha tastady.
Qatysýshylar arasynda kvazımemlekettik sektordyń qyzmetkeri, zapastaǵy aǵa leıtenant Baýyrjan Táttimbekov te bar. Ol úshin bul ekinshi jıyn — alǵash ret 2018 jyly Qurlyq áskerleriniń áskerı ınstıtýtynda ótken jıynǵa qatysqan.
— Jıyn — daǵdylardy qalpyna keltirýge jáne jańa bilim alýǵa tamasha múmkindik. Mundaı shara men úshin eldiń qaýipsizdigine naqty úles qosýdyń tásili. Biz Otandy kez kelgen ýaqytta qorǵaýǵa daıyn bolýymyz kerek, — dedi Baýyrjan Táttimbekov.
Jıyn 17 qyrkúıekke deıin jalǵasady. Qoldanystaǵy zańnamaǵa sáıkes áskerı mindettiler úshin áskerı jıyndardan ótý kezeńinde jumys orny men ortasha jalaqy saqtalady.
Aıta ketelik áskerge shaqyrylǵandardy kósheden ustap áketýge tyıym salynǵan edi.