Pedagogtardyń jalaqysy 1 jylda 27 paıyzǵa ósti

NUR-SULTAN. QazAqparat – 2021 jyldyń ekinshi toqsanynda elimizdiń bilim salasynda 528,4 myń adam eńbek etti. Bul 1 jyl burynǵy kórsetkishten 2,5 paıyzǵa joǵary. Ótken jyldyń dál osyndaı kezeńinde sektorda 515,5 myń adam eńbek etken bolatyn, dep habarlaıdy QazAqparat tilshisi.

Ranking.kz málimetinshe, óńirler arasynda bilim berý salasynda eńbek etetin eń kóp pedagog Almaty oblysynda tirkelgen: 68,3 myń adam. Úzdik úshtikke Almaty qalasy men Shyǵys Qazaqstan oblysy da kiredi. Al Atyraý oblysynda bilim berý salasynda 14,2 myń adam ǵana jumys isteıdi. 2021 jyldyń ekinshi toqsanynda bilim berý salasy qyzmetkerleriniń ortasha aılyq jalaqysy 233,9 myń teńgeni qurady. Bul bir jyl burynǵy jalaqydan 26,8 paıyzǵa joǵary.

Elimizde mektepke deıingi bilim salasy qyzmetkerleriniń ortasha jalaqysy 116,4 myń (ósim 20,1 paıyz), bastaýysh bilimde 193,4 myń (11,2 paıyz), orta bilimde 273,7 myń (19 paıyz), joǵary bilimde 251,7 myń (12,2 paıyz) teńgeni qurady.

Óńirler arasynda elorda pedagogtary eń joǵary jalaqy alady. Olardyń jalaqysy bir jyldyń ishinde 17,6 paıyzǵa artyp, 350,8 myń teńgege jetti. Ekinshi jáne úshinshi orynǵa Mańǵystaý oblysy (268 myń) men Almaty qalasy (265,5 myń) ornalasqan. Al Batys Qazaqstan oblysy pedagogtarynyń jalaqysy bir jylda 31,6 paıyzǵa óskenimen, basqa óńirlermen salystyrǵanda eń tómen: 200,7 myń teńge. Qazaqstannyń 17 óńiriniń tek 5 eýinde ǵana qyzmetkerlerdiń jalaqysy elimiz boıynsha ortashadan asyp tústi.

QR Bilim jáne ǵylym mınıstrliginiń málimetinshe, 2020 jyldyń qańtarynda balabaqshalar, mektepter men kolledjder pedagogtarynyń jalaqysy taǵy 25 paıyzǵa artatyn bolady. Sonymen qatar osy jyldyń qyrkúıeginen bastap pedagogtardy jumysqa qabyldaý júıesi ózgertilip, bilim berý uıymdarynyń dırektorlaryn taǵaıyndaýdyń jańa júıesi engiziledi.