Pedagogtardyń ústemeaqysyna jetkilikti qarajat bólinbeı otyr – Álı Bektaev
NUR-SULTAN. QazAqparat – «Aýyl» halyqtyq-demokratııalyq patrıottyq partııasynyń tóraǵasy Álı Bektaev pedagogtar ústemeaqysynyń ýaqytyly berilmeýi máselesin kóterdi, dep habarlaıdy QazAqparat tilshisi.
«Árıne, problema kóp. Qarjy tapshy. Onyń barlyǵy jaqsy túsinemiz. Biraq, aıtylmasa bolmaıtyn bir kúrdeli másele bar. 2019 jyldyń 1 maýsymynan 30 paıyzǵa kóbeıgen bilim salasyndaǵy bastaýysh, negizgi jáne jalpy orta bilim berý uıymdarynyń muǵalimderi men pedagog-psıhologtarynyń jalaqysy 2020 jylǵa tolyq qaralmaǵan. Tek Túrkistan oblysy boıynsha 12,8 mlrd teńge kóleminde qarjy jetpeıdi. Osyndaı jaǵdaı basqa oblystarda da qalyptasqan. QR Eńbek jáne halyqty áleýmettik qorǵaý mınıstrliginiń bizge bergen málimetine súıensek, 2020-2022 jyldarǵa arnalǵan respýblıkalyq bıýdjetten osy maqsatqa ár jyly 350,3 mlrd teńge qarjy bólý týraly usynym jasalǵan. Ókinishke oraı, 2019 jyldyń 27 tamyzynda ótken Respýblıkalyq bıýdjet komıssııasynyń qorytyndysy boıynsha, tek 317,3 mlrd teńge qarjy ǵana qoldaý taýyp, ár jylǵa óńirlerge bólinetin aǵymdaǵy maqsatty transfertterge 33 mlrd teńge az qaralǵan. ıAǵnı, barlyq oblystar men qalalar boıynsha osynsha qarjy jetispeıdi degen sóz», - dep atap ótti depýtat QR Parlamenti Senatynyń otyrysynda .
Onyń aıtýynsha, QR Ulttyq ekonomıka mınıstrliginiń jaýabynda Bıýdjet kodeksiniń 45-babyna sáıkes, jetispeıtin qarajatty respýblıkalyq bıýdjetten maqsatty transfertter retinde bóldirý qajettigi aıtylǵan.
«Al Qarjy mınıstrligi bolsa, jergilikti bıýdjetke silteıdi. Ókinishke qaraı, Túrkistan oblysy ákimdiginen QR Parlamenti Senatynyń depýtaty Álimjan Qurtaevtan túsken usynystarǵa qaramaı, bul másele 2020 jylǵy bıýdjettiń naqtylanýy barysynda da eskerilmeı qalǵandyǵy tań qaldyrady. Oblys ákimdigi Túrkistanda atqarylyp jatqan qyrýar jumys arasynan bólip júrip, 7,4 mlrd teńge qarjyny jergilikti bıýdjet esebinen qarastyryp otyr. Sonda qalǵany – 5,4 mlrd teńge. Biraq, bul – on myńdaǵan muǵalimder men tárbıeshilerdiń, psıhologtardyń, sol saladaǵy eń aýyr jumysta júrgen azamattyq qyzmetshilerdiń jalaqysy. Olardyń aılyqtary onsyz da az. Endi kelip, memleket tarapynan kúnkóris deńgeıin kóterý maqsatynda qaralǵan ústemeaqyny da ýaqytynda ala almaıtyn túri bar. Týrasyn aıtqanda, bul ústemeaqy ǵana emes, ózderiniń mańdaı terimen tapqan eńbek tabysy», - dedi Á. Bektaev.
Bul rette depýtat 2020 jyldyń halyq úshin ońaı bolmaǵanyn eske saldy. Panedmııa talaı adamdy qıyndyqta qaldyrdy, jumyssyz qaldyrdy, tabysynan aıyrdy.
«Soǵan qosa, Qarjy mınıstrligi taǵy bir problemany qoldan jasap otyr. Dál jańa jyl aldynda jalaqysyn ala almaǵan halyqtyń kóńil-kúıin kóz aldyńyzǵa elestetip kórińizshi. Bizdiń jaýapty memlekettik organdar qashanǵy bir-birine siltep, arzymaıtyn nárseni oıynshyqqa aınaldyryp, halyqty sarsańǵa sala beredi? Respýblıka boıynsha 33 mlrd teńge bizdiń memleket úshin asa kóp qarjy emes. Jyl sońyna deıin eki aı qalǵanyn eskersek, bul problemany tezirek sheshý kerek. Búgingi qaralyp otyrǵan 2020 jyldyń bıýdjetin naqtylaý barysynda, QR Úkimetiniń rezervi 4 ese kóbeıtilip, 316 mlrd teńgeni qurap otyr. Úkimet rezervinen osyndaı qaryzdardy jappaǵanda, qandaı nársege jumsaý kózdelip otyr? Biz aıtyp otyrǵan máseleni de Tótenshe jaǵdaı dep qaraýǵa bolady. Qurmetti Eraly Luqpanuly! Erulan Kenjebekuly! Jańa jyl talaı jańalyqtarǵa toly bolaıyn dep otyr. Aldymyzda bizdi tarıhı oqıǵalar, saıası naýqandar, Táýelsizdigimizdiń 30 jyldyǵy kútip tur. Olaı bolsa, bizdiń Úkimetimiz halyq úshin ashyq jáne estıtin Úkimet ekenin osy problemany sheshý arqyly dáleldeıdi ǵoı dep oılaımyz», - dep sózin qorytyndylady Álı Bektaev.
