Pedagogtardyń tamyz keńesi: Jańa 20 mektep avtobýsynyń kilti tapsyryldy
KÓKShETAÝ. QazAqparat - Aqmola oblysynda aýdandyq bilim bólimderine jańa 20 mektep avtobýsynyń kilti tapsyryldy, dep habarlaıdy QazAqparat tilshisi.
Búgin Kókshetaýda jyldaǵy dástúr boıynsha Aqmola oblysynyń bilim salasy qyzmetkerleriniń tamyz keńesi ótti. «Kókshetaý» mádenıet saraıynda uıymdastyrylǵan sharaǵa aımaq basshysy Málik Myrzalın, Qazaqstan Respýblıkasy Bilim jáne ǵylym mınıstrliginiń ókili, zań qyzmeti jáne halyqaralyq yntymaqtastyq departamentiniń dırektory Nurseıit Baıjanov qatysty.
«Jyldar boıy dástúrge aınalǵan tamyz keńesi ótken oqý jylyna tereń taldaý jasaýymyzǵa, ózekti máselelerdi anyqtaýǵa, jańa oqý jylyna jańa mindetter qoıýǵa múmkindikter beredi», - dedi M.Myrzalın.
Shara barysynda aımaq basshysy jańa 20 mektep avtobýsynyń kiltin oblysymyzdyń ár óńirinen kelgen bilim bólimi basshylaryna saltanatty túrde tabys etti. Bul maqsatta oblys bıýdjetinen 286 mıllıon teńge qarjy bólingen.
Oǵan qosa, bilim berý salasynda jaqsy jetistikterge qol jetkizgen muǵalimder men oqý oryndarynyń basshylary, balabaqsha tárbıeshileri oblys ákiminiń Alǵys hattarymen marapattalyp, birqatar ustazdarǵa Y.Altynsarın jáne «Bilim berý isiniń úzdigi» tósbelgileri tabys etildi.
Sonymen qatar, oblystyq bilim basqarmasynyń uıymdastyrýymen ótken «Bilim salasynyń úzdik uıymy» atty oblystyq baıqaýynyń jeńimpazy atanǵan Jaqsy aýdanynyń Qabdesh Óskenbaev atyndaǵy Qıma orta mektebiniń ujymy 22 627 200 teńgeniń aqshalaı arnaıy sertıfıkatyna ıe boldy.
