Pedagogtardy bedeldi, tanymal tulǵalarǵa aınaldyrý kerek – Memleket basshysy

NUR-SULTAN. QazAqparat – QR Prezıdenti Qasym-Jomart Toqaev muǵalimder men oqytýshylardyń qoǵamdaǵy bedelin arttyrýdy tapsyrdy, dep habarlaıdy QazAqparat tilshisi.

«Pedagogtardyń mártebesine qoldaý kórsetý qajet. Olardy qoǵamdaǵy bedeldi, tanymal tulǵalarǵa aınaldyrý kerek», - dedi Memleket basshysy Ulttyq qoǵamdyq senim keńesiniń onlaın formattaǵy 3-otyrysynda.

«Meniń tapsyrmammen aldaǵy tórt jylda muǵalimderge tólenetin jalaqyny eki ese arttyrý qarastyrylǵan. Odan bólek, bilim sapasyn qamtamasyz etý óte mańyzdy. Pedagogıkalyq bilim berýdi jańǵyrtý oqý josparlarynyń 100% jańartylýyn, IT-quziretter, oqytýdyń zamanaýı ádisteri men tehnologııalary boıynsha arnaıy modýl engizýdi qamtamasyz etýi kerek», - dedi Qasym-Jomart Toqaev.

Sonymen birge, Prezıdent pedagogıkalyq mamandyqtarǵa túsý talaby kezeń-kezeńimen kúsheıetinin, bolashaq pedagogtardyń shákirtaqysy 26 myń teńgeden 42 myń teńgege deıin ósetinin aıtty.