Pedagogtar synyp tazalap júr: Almatyda beınejazbaǵa baılanysty tekseris bastaldy
ALMATY. KAZINFORM – Almatyda muǵalimderdiń qyzmetinen tys jumysqa tartylýyna baılanysty tekseris bastaldy.
Áleýmettik jelide Almatydaǵy mektepte muǵalim bolyp jumys isteıtinin aıtqan áıel óz shaǵymyn bildirdi. Onyń aıtýynsha, ustazdar tamyz aıynda jumysqa shyǵyp, bilim ordasynyń kabınetterin tazalaýǵa mindetti. Ár muǵalimge belgili bir kabınet bekitilgen.
– Maǵan kóp adam «nelikten muǵalimder tamyz aıynda sonshalyqty erte jumysqa shyǵady» degen suraq qoıady. Biz tereze jýý úshin jumysqa shyǵamyz. Bizge bekitilgen kabınet bar. Tipti bul seniń tikeleı mindetińe kirmese de, ony jasaýǵa mindettisiń. Áıtpese bizge saǵatsyz qalasyńdar dep aıtady, – deıdi beınejazbaǵy áıel.
Jaǵdaıǵa qatysty Almaty qalasynyń Bilim basqarmasy jaýap berdi. Vedomstvo basshysynyń buıryǵymen qazir bul derek boıynsha arnaıy monıtorıngtik top qurylǵan. Olar oqıǵanyń mán-jaıyn jan-jaqty tekserý úshin bilim berý uıymyna barady.
– Tekserý aıasynda barlyq mán-jaıdy anyqtaý úshin mekteptiń pedagogıkalyq quramy men ákimshilik-sharýashylyq quramynan jaýap alynady, – delingen málimdemede.
Tekserý qorytyndysy boıynsha qabyldanǵan sharalar týraly qosymsha habarlanatyn bolady. Jaǵdaı Almaty qalasy Bilim basqarmasy basshysynyń jeke baqylaýynda.
Eske salaıyq, 2026–2027 oqý jylyndaǵy muǵalimderge arnalǵan jańa talaptar tanystyryldy.
