Pedagogtar men mádenıet qyzmetkerleriniń aılyǵyn kóterýge qansha qarjy bólinedi

NUR-SULTAN. QazAqparat – Qarjy mınıstriniń birinshi orynbasary Berik Sholpanqulov 2020-2022 jyldarǵa arnalǵan respýblıkalyq bıýdjet jobasyna Májilisten keıin qandaı ózgerister engizilgenin aıtyp berdi, dep habarlaıdy QazAqparat tilshisi.

«Májiliste bıýdjet jobasyn talqylaý barysynda birqatar túzetýler engizildi. Atalǵan túzetýler Elbasynyń jáne Memleket basshysynyń Joldaýynda bergen tapsyrmalaryn iske asyrýǵa, sondaı-aq depýtattardyń usynystary boıynsha halyqtyń ómir súrý sapasyn arttyrýǵa jáne óńirlerdi damytýǵa baǵyttalyp otyr. Negizgi ózgerister pedagogtar men mádenıet qyzmetkerleriniń jalaqysyn kóterý úshin engizildi. Bul maqsatta jumsalatyn qarajat shamamen 1,1 trln teńgeden asady», - dedi Berik Sholpanqulov Senat depýtattary aldynda.

Vıtse-mınıstrdiń aıtýynsha, osy rette salyqtyq túsimderdi ulǵaıtyp, shyǵyndardy ońtaılandyrý kózdelip otyr.

«Elbasynyń jáne Prezıdenttiń tapsyrmalaryn iske asyrýǵa 2020-2022 jyldarǵa arnalǵan respýblıkalyq bıýdjette 8,5 trln teńge, onyń ishinde 2020 jylǵa 2,7 trln teńge kózdelgen», - dedi ol.

Aıta ketsek, búgin Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblıkalyq bıýdjet jobasyn tanystyrǵan bolatyn.