«Pedagogtar mártebesi týraly» zań jobasy Parlamentke qashan joldanady
ASTANA. QazAqparat - «Pedagogtar mártebesi týraly» zań jobasynyń Parlamentke qashan joldanatyny belgili boldy, dep habarlaıdy QazAqparat tilshisi.
«Memleket basshysynyń tapsyrmasymen «Pedagogtar mártebesi týraly» zań jobasyn ázirleý jumysy qalaı júrgiziledi? Zań jobasyn ázirleýde pedagogtardyń qazirgi mártebesin keń aýqymda zertteı otyryp, talqyǵa muǵalimder men sarapshylardy shaqyrý josparlaryńyzda bar ma? Zań jobasyn Parlamentke qashan joldaısyzdar?», - dep suraq qoıady «Ashyq úkimet» portalynda Jazıra Toǵanbaeva esimdi turǵyn Bilim jáne ǵylym mınıstri Erlan Saǵadıevke.
Bul suraqqa jaýap bergen Bilim jáne ǵylym mınısti Erlan Saǵadıev atalmysh zań jobasyn ázirleý maqsatynda jumys toby qurylyp qoıǵanyn jarııa etti. Mınıstrdiń aıtýyna qaraǵanda, jumys tobyna ǵalymdar, muǵalimder, zańgerler, depýtattar men kásipodaq kóshbasshylary engen.
«Jumys toby tujyrymdamany ázirlep, zań jobasynyń qurylymy men mazmunyn aıqyndady. QR BǴM saıtynda jáne «Bilimdi el» - «Obrazovannaıa strana» gazetteriniń betterinde «Pedagogtar mártebesi týraly» zań jobasyn talqylaý» atty bólim ashyldy. Qazirgi tańda zań jobasynyń tujyrymdamasy qoǵamdyq talqylaý úshin ashyq normatıvti quqyqtyń qujattardyń ınternet-portaldarynda, mınıstrliktiń saıtynda jarııalanyp, bir sheshimge kelý úshin jergilikti atqarýshy organdar men memlekettik organdarǵa joldandy», - dep jaýap beredi Erlan Saǵadıev.
Mınıstrdiń habarlaýynsha, zań jobasynyń tujyrymdamasy sarapshylyq qorytyndy alý úshin akkredıttelgen jeke kásipkerlik sýbektileriniń qaýymdastyqtaryna jáne ulttyq kásipkerlik palataǵa da jiberilgen.
«Memleket basshysynyń Joldaýyndaǵy mindetterdi júzege asyrý jáne Jalpyulttyq josparǵa sáıkes, zań jobasy QR Parlamentine 2019 jyldyń naýryz aıynda joldanady», - deıdi Erlan Saǵadıev.
