Pedagogtar mártebesi: Muǵalimderdiń júktemesin 18-den 16 saǵatqa azaıtý kózdelýde

ASTANA. QazAqparat - Bilim jáne ǵylym vıtse-mınıstri Ashat Aımaǵambetov Pedagogtar mártebesi týraly zańda qandaı máseleler qamtylatynyn aıtyp berdi, dep habarlaıdy QazAqparat tilshisi.

«5 qazanda Elbasynyń Qazaqstan halqyna Joldaýynda muǵalimderdiń máselesi keńinen kóterilgenin bilesizder. Eń basty nazar aýdararlyq jaı - kópten beri bizdiń ustazdarymyzdyń kókeıinde júrgen máseleler aıtyldy. Sonyń biri - Pedagogtardyń mártebesine qatysty. Bul rette osy zalda kóptegen áriptesterimizdi kórip otyrmyn. Rektorlar, dırektorlar on jyl boıy Pedagogtardyń mártebesi týraly zańdy qabyldaıyq dep, máseleni ár alqa májilisinde kóterip júrgen bolatyn. Sondyqtan, Elbasy osy zańdy qabyldaý týraly tapsyrma berdi», - dedi Ashat Aımaǵambetov Astanada ótip jatqan «Nur Otan» partııasy bastaýysh uıymdarynyń respýblıkalyq forýmynda.

Vıtse-mınıstr óz sózinde atalmysh jańalyqtyń jaǵymdylyǵyn birden baıqaǵanyn aıtady.

«Barlyq áleýmettik jelilerde búgingi kúnge deıin osy másele talqylanyp jatyr. Bul shyn máninde, bilim salasyn - taǵy bir úlken satyǵa kóteretin suraqtardyń biri. Bul zańda pedagogtardyń áleýmettik mártebesin kóteretin stımýldar, oqý júktemesin azaıtý, kerek emes tekserý komıssııalarynan qorǵaý, taǵy basqa máselelerdi kóteretin bolamyz. Men osy minberdi paıdalana otyryp, sizdermen birge osy zańdy talqylaýǵa qatysýlaryńyzdy suraǵym keledi. 2 kún osynda bolasyzdar. Bizge beretin usynystaryńyz bolsa, óte rıza bolar edik. Qazir biz áleýmettik jelide de, gazet pen saıttar arqyly da usynystardy jınap jatyrmyz. Eki-úsh aıdan keıin tujyrymdamany jasap, jan-jaqty halyqpen talqylap, Parlamentke zań jobasyn engizetin bolamyz», - dedi Ashat Aımaǵambetov.

Vıtse-mınıstrdiń aıtýynsha, atalmysh zań jobasynda talqylanatyn máselelerdiń biri - júktemeni azaıtý.

«Ózderińiz biletindeı, TMD elderiniń ishinde biz balalarǵa salynatyn júktemesi jaǵynan sózsiz chempıonbyz. Máselen, 11 synyptarda - 39 saǵat (...) Bul óte kóp. Álbette, 50-60 saǵatqa deıin uzartýǵa bolar, biraq bul qadam sapaǵa qanshalyqty áser etedi. Mine, sondyqtan, Memleket basshysy júktemeni azaıtý qajettigin aıtyp otyr. Biz balalardyń júktemesin azaıta otyryp, muǵalimderdiń saǵaty, júktemesi, aılyǵy máselesin sheshemiz. Atalmysh zań jobasy aıasynda pedgogtardyń júktemesin de azaıtý kózdelgen. Qazir bir stavkanyń - 18 saǵat ekenin bilesizder. Biz ony 16 saǵatqa azaıtýdy kózdeýdemiz», - dedi vıtse-mınıstr.

Eske sala ketsek, elordadaǵy Kongres-ortalyqta «Nur Otan» partııasynyń bastaýysh uıymdarynyń respýblıkalyq forýmy ótip jatyr.