Pedagogıkalyq JOO túlekteri mindetti túrde sertıfıkattaýdan ótedi
ASTANA. QazAqparat - Elimizdiń pedagogıkalyq joǵary oqý ornyn bitirgen barlyq túlek sertıfıkattaýdan ótedi. Bul týraly búgin Senattyń Áleýmettik-mádenı damý jáne ǵylym komıtetinde ótip jatqan dóńgelek ústel otyrysynda QR Bilim jáne ǵylym vıtse-mınıstri Ashat Aımaǵambetov aıtty, dep habarlaıdy QazAqparat tilshisi.
«Osy jyldan bastap-aq ilki rejimde sertıfıkattaý protsedýrasyn bastaǵymyz keledi. ıAǵnı, aǵymdaǵy oqý jylynda pedagogıkalyq joǵary oqý oryndarynyń barlyq túlekterin sertıfıkattaýdan ótkizýdi josparlaýdamyz. Buǵan qosa, bizde muǵalimderge arnalǵan ulttyq biliktilik testi daıyn. Bıyl 33 myńnan astam bolashaq pedagog oqý ornyn bitiredi jáne biz olardy sertıfıkattaýdan ótkizbekpiz», - dedi Ashat Aımaǵambetov.
Sonymen qatar ol sertıfıkattaýdyń táýelsiz júıesin engizý qajettigin atap ótti.
«Bizge kásibı standarttar qajet, olar óte az. Sertıfıkattaý ortalyǵy da kerek. Ókinishke oraı, bul jerde jaýapqa qaraǵanda suraqtar kóp», - dedi vıtse-mınıstr.
Onyń aıtýynsha, biliktiliktiń ulttyq shegin de jetildirý qajettigi týyndap otyr.
«Bizde biliktiliktiń ulttyq shegi bar. Ókinishke oraı, joǵary bilim berý júıemizdiń ózin sertıfıkattamaq bolyp, Eýropalyq odaqtyń jetekshi sarapshylaryn shaqyrǵanymyzda olar tórtinshi, besinshe deńgeıdegi «qysqa tsıkilderde» sáıkessizdikterdiń bar ekendigin kórsetti. Bul jerde biliktiliktiń ulttyq júıesine zańnamalyq ózgertýler jáne retteý engizýimiz qajet», - dedi vıtse-mınıstr.
