Pedagogıkalyq JOO stýdentteri bilimdi aqparattandyrý salasy boıynsha daıyndyqtan ótýi tıis - QazUÝ prorektory
ALMATY. Qazannyń 6-sy. QazAqparat /Erlik Erjanuly/ - Pedagogıkalyq joǵary oqý oryndarynda ádistemeni qalaı oqytatyn bolsa, bilimdi aqparattandyrýdy da solaı oqytý kerek. Ony Qazaqtyń ál-Farabı atyndaǵy ulttyq ýnıversıtetiniń 1-inshi prorektory, fızıka-matematıka ǵylymdarynyń doktory, professor Maqtaǵalı Bektemesov Almatyda ótken «Bilim men ǵylymdaǵy aqparattyq tehnologııa jáne matematıkalyq modeldeý» dep atalatyn V halyqaralyq ǵylymı-ádistemelik konferentsııada aıtty.
«Bilimdi aqparattandyrýdy is-áreket retinde qazirgi jáne bolashaq pedagogtardyń bárine oqytý kerek. Pedagogıkalyq joǵary oqý oryndarynyń stýdentteriniń barlyǵy bilimdi aqparattandyrý salasy boıynsha daıyndyqtan ótýi tıis. Bilimdi aqparattandyrý - bul oqytýdy ǵana aqparattandyrý emes. Ol oqý qyzmetin, oqytý nátıjelerin baqylaý men ólsheýdi, oqýdan tys qyzmet pen tárbıeleý úrdisterin, ǵylymı zertteý men ǵylymı ádistemelik jáne uıymdastyrý-basqarý qyzmetin de aqparattandyrý», - deıdi Maqtaǵalı Ábdimájıtuly. Ǵalymnyń paıymdaýynsha, resýrstar men tehnologııalar sapaly bolyp, sapanyń keshendi saraptamasynan ótýi tıis. Olardy paıdalaný, kóp bolsa, tipti jaqsy degen qaǵıda boıynsha júzege asyrylmaýy kerek. Qaı jerge qajet bolsa sol jerdegi bilim júıesiniń talaptaryna saı bolýy tıis. Al qazir bizde aldymen resýrs jasalynady, al ol qaı jerde, qalaı paıdalanylatynyn jan-jaqty saraptan ótkizbeıdi. Sol sebepti aldymen oqytýdyń ádistemelik júıesin túsinip alyp, sodan keıin ǵana qajetti resýrstardy anyqtap, jasaý qajet.
