Pedagogıkalyq ýnıversıtetterdi oqý-aǵartý mınıstrliginiń qaramaǵyna berý kerek - Ashat Aımaǵambetov
«Aýyl sharýashylyǵy men mádenıet salasyndaǵy joǵary oqý oryndaryn Ǵylym jáne joǵary bilim mınıstrliginiń qaramaǵyna berý týraly usynys aıttym. Osyǵan deıin Úkimet quramynda jumys istep, tıisti tájirıbem bolǵannan keıin, bul usynysty engizdim. Negizi buǵan deıin dál osyndaı júıe bolǵan jáne ol óziniń tıimdiligin kórsetken edi. Keıinnen atalǵan joǵary oqý oryndary tıisti mınıstrlikterdiń qaramaǵyna berildi. Bul turǵyda oqý oryndarynyń jumysy birshama tejelip qaldy deýge boldy. Qazir olardaǵy bilim berý baǵdarlamalary, ǵylymı-zertteý ınstıtýttarynyń áleýeti jáne nátıjeleri tıisti deńgeıde emes. Meniń oıymsha, bul ýnıversıtetter jańadan qurylǵan Ǵylym jáne joǵary bilim mınıstrliginiń quramynda jumys isteýi kerek», - dedi A. Aımaǵambetov Májilistegi Úkimet saǵatynan keıin tilshiler suraǵyna jaýap bere otyryp.
Sonymen qatar, ol Oqý-aǵartý mınıstrliginiń qaramaǵyna pedagogıkalyq ınstıtýttar men ýnıversıtetterdi berý usynysyn aıtty.
«Atalǵan mınıstrlik qaramaǵynda mamandyǵyna saı keletin arnaýly ýnıversıtetteriniń bolýy óte mańyzdy. Sebebi, olardyń ózderiniń ereksheligin eskere otyryp, mekteptermen tyǵyz baılanysta kúndelikti jumys isteýi kerek», - dedi depýtat.
Budan buryn habarlanǵandaı, búgin Májiliste ǵylymdy damytý taqyrybyndaǵy Úkimet saǵatynda Ǵylym jáne joǵary bilim mınıstri Saıasat Nurbek jastar PhD ǵylym dárejesin alyp, ýnıversıtetke jumys isteýge barmaıtynyn aıtty.
