Pedagogıkalyq ıdeıalar panoramasy baıqaýyna qatysýshylar sany úsh ese artqan

ASTANA. KAZINFORM - QR Oqý-aǵartý mınıstrligi «Órleý» biliktilikti arttyrý ulttyq ortalyǵy jyl saıyn uıymdastyratyn respýblıkalyq «Pedagogıkalyq ıdeıalar panoramasy» baıqaýynyń aýqymy jyl saıyn artyp keledi. Bıyl konkýrsqa 16 000-nan asa ótinim qabyldandy.

Mınıstrliktiń baspasóz qyzmetiniń habarlaýynsha, bul kórsetkish ótken jylmen salystyrǵanda úsh ese kóp. Mundaı ósim pedagogterdiń fýnktsıonaldyq saýattylyqty damytýǵa jáne tájirıbe almasýǵa degen qyzyǵýshylyǵynyń artqanyn aıqyn kórsetedi.

Óńirlik saraptamalyq komıssııalar baǵalaý jumystaryn aıaqtap, respýblıkalyq kezeńge 140 úzdik jumys joldama aldy.

Fınalısterdiń beınematerıaldary «Órleý» biliktilikti arttyrý ulttyq ortalyǵynyń YouTube-arnasynda jarııalandy.

Fınalısterge turǵyndar qoldaý bildire alady. Platformadaǵy qaralymdar men reaktsııalar «YouTube-te eń kóp qaralǵan beınematerıal» nomınatsııasynyń jeńimpazyn anyqtaý kezinde eskeriletin bolady.

Baıqaý jeńimpazdaryn marapattaý rásimi 20 jeltoqsanda Astana qalasynda ótedi.

Osyǵan deıin Qazaqstannyń álemniń úzdik 100 bilim berý ınnovatsııasynyń qataryna engeni týraly jazdyq.