Pedagog-psıhologter men áleýmettik pedagogter jyl saıyn biliktilikterin arttyrady
ASTANA. KAZINFORM — Pedagog-psıhologter men áleýmettik pedagogter jyl saıyn biliktilikterin arttyrady. Bul týraly búgin Úkimet otyrysynda Oqý-aǵartý mınıstri Juldyz Súleımenova aıtty.
- Balalardyń quqyqtary men múddelerin tıimdi qorǵaý jáne olardyń qaýipsizdigi kóbinese mamandardyń biliktiligine baılanysty. Tujyrymdama («Qazaqstan balalary» tujyrymdamasy) kadrlyq áleýetti júıeli túrde nyǵaıtýdy qarastyrady. Pedagog-psıhologter jáne áleýmettik pedagogterge qoıylatyn talaptar kúsheıtilip, jyl saıyn olardyń biliktiligin arttyrý josparlanýda. Qazirgi tańda 4 óńirde balalardyń quqyqtaryn qorǵaý basqarmalary quryldy, qalǵan óńirlerde osy jyldyń naýryz aıyna deıin ashylýy kútilýde. Oblys ákimderi, osy rette jumysty ýaqytyly aıaqtaýǵa kóńil bólýlerińizdi suraımyn, - dedi ol.
Onyń aıtýynsha, Memleket basshysynyń tapsyrmasy boıynsha balalarǵa arnalǵan qaýipsiz orta qurýǵa baǵyttalǵan keń aýqymdy sharalar iske asyryldy. «Keleshek mektepteri» ulttyq jobasy aıasynda 217 mektep salý, sondaı-aq mektep ınfraqurylymyn jańǵyrtýǵa baǵyttalǵan sharalar balalardyń zamanaýı ári qaýipsiz oqý jaǵdaılaryna qoljetimdiligin qamtamasyz etip, qala men aýyl arasyndaǵy bilim berý ortasynyń sapasyn teńestirýge múmkindik berdi.
- 677 balabaqshanyń ashylýy 65 myń balanyń mektepke deıingi bilimge qoljetimdiligin arttyrdy. Balalardyń qaýipsizdigi úshin mektepter mańynda jaıaý júrginshilerge arnalǵan joldar men kóshege jaryq shamdary ornatyldy. Tujyrymdama aıasynda balalardyń jol qozǵalysynyń qaýipsizdigi jáne tasymalyn arttyrýǵa baǵyttalǵan keshendi sharalar júzege asyrylady. Sýda bolǵan qaıǵyly oqıǵalardyń aldyn alý, sonyń ishinde jabdyqtalǵan jáne qaýipsiz shomylý oryndarynyń sanyn arttyrý, balalardy júzý daǵdylary men sýda qaýipsiz minez-qulyqqa úıretý qarastyrylǵan, - dedi Juldyz Súleımenova.
Aıta keteıik, «Qazaqstan balalary» tujyrymdamasy 1,3 trln teńge kóleminde qarjylandyrylady.