«Pedagog mártebesi» jobasy: Muǵalimderdiń balalaryna balabaqsha kezeksiz beriledi
NUR-SULTAN. QazAqparat - Muǵalimderdiń balalaryna balabaqshaǵa birinshi kezekte oryn beriledi. Bul týraly búgin Úkimet otyrysynda «Pedagog mártebesi týraly» zań jobasyn tanystyrǵan QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Elbasy Nursultan Nazarbaevtyń tapsyrmasy aıasynda mınıstrlik «Pedagog mártebesi týraly» jáne «Keıbir zańnamalyq aktilerge pedagog mártebesi, muǵalim men oqýshyǵa júktemeni tómendetý máselesi boıynsha ózgerister men tolyqtyrýlar engizý týraly» zań jobalaryn ázirledi. Zań jobalaryn ázirleý kezinde arnaýly jumys toby quryldy. Olar elimizdiń barlyq aımaǵynda pedagog qaýymmen kezdesti. Osy aralyqta jalpy 18 myńnan astam usynys taldandy. Barlyq usynystar muǵalimder men saraptamalyq qoǵamdastyqpen keńinen talqylanyp ótti. Sondaı-aq, áleýmettik jelilerde 5 tikeleı translıatsııa ótkizildi», - dedi ol.
Mınıstrdiń atap ótýinshe, zań jobalaryn daıyndaý barysynda pedagogıkalyq qyzmetti retteýdiń halyqaralyq tájirıbesi eskerildi. Atap aıtqanda birqatar shet eldiń zańdary, ıÝNESKO-nyń muǵalimderdiń jaǵdaıy týraly usynystary qarastyryldy.
«Pedagog mártebesi týraly» zań jobasy 19-baptan turady. Al qosymsha zań jobasy 192-bapty qamtıdy. Jalpy zań jobasy aýqymdy 5 baǵyttan turady. Atap aıtqanda, materıaldyq jáne materıaldyq emes yntalandyrý, áleýmettik kepildikter, ustazdardyń quqyqtaryn keńeıtý, muǵalimderdiń júktemesin azaıtý. Materıaldyq emes yntalandyrýǵa keler bolsaq, olar muǵalimderdiń júktemesin tómendetý, ar-namysy men qadir-qasıetin qorǵaý kepildigi, muǵalimderdiń balalaryna balabaqshaǵa birinshi kezekte oryn berý, Qazaqstannyń eńbek sińirgen ustazy memlekettik nagradasyn berý, taǵy basqa da materıaldyq emes yntalandyrýlar qarastyrylǵan», - dedi ol.
Mınıstrdiń aıtýynsha, muǵalimderdiń kásibı quqyqtary keńeıtildi. Máselen, oqytý men tárbıeleýdiń avtorlyq ádisterin ázirleý jáne qoldaný, oqý quraldaryn tańdaý, aqparattyq resýrstardy tegin qoldaný, biliktilikti arttyrý kýrstaryn ózderi tańdaý quqyqtary berilip otyr.
«Saılaný jáne saılanbaly laýazymdarǵa ornalasýdyń jańa quqyqtary da engizildi. Bul sharalardyń barlyǵy muǵalimderdiń jeke damýyna jáne oqý protsesin jetildirýge múmkindik jasaıdy dep senemiz», - dedi A.Aımaǵambetov.
