Pedagog mártebesi: Jalaqyny kóterý men biliktilikti arttyrýda, muǵalimdikke ornalasýda ózgerister bolady
Bıyl qyrkúıek aıynan bastap joǵary oqý oryndary rektorlarynyń reıtıngisi engiziledi. Osy reıtıng qorytyndysy boıynsha kadrlyq ári uıymdastyrýshylyq sheshimder qabyldanbaq.
Atap aıtqanda, mańyzdy jańalyqtardyń biri - «Álippe» jáne «Býkvar» oqýlyqtary mektep baǵdarlamasyna qaıta oralady. 1 qyrkúıekte ótetin saltanatty is-sharada mektep tabaldyryǵyn alǵash attaǵan barlyq birinshi synyp oqýshylaryna «Álippe» birinshi oqýlyǵy retinde beriledi. Bul oqýlyq Ahmet Baıtursynulynyń ádistemesi boıynsha jasalǵan. «Álippe» jáne «Býkvar» oqýlyqtary mazmuny jaǵynan birdeı jáne birinshi synyp oqýshylarynyń jas erekshelikterin eskere otyryp jasalǵan.
Budan bólek mektepterde oqýlyqtardyń alternatıvtiligi qamtamasyz etiletin bolady.
«Ol boıynsha biz qazirgi ýaqytta zańnamaǵa tıisti ózgerister daıyndap jatyrmyz. Bul turǵyda 1-den 11-synyp aralyǵyndaǵy oqýlyqtardyń alternatıvtiligi eskerilip otyr. Bizdińshe, bul óte mańyzdy másele. Osy oraıda tıimdi dep sanalatyn oqýlyqtardy pedagogtardyń ózderi tańdaý múmkindigin qamtamasyz etý mańyzdy. Qazir bizde biryńǵaı oqýlyqtar bar. Olar beıindilikti eskermesten, gımnazııa, lıtseı jáne jalpy bilim beretin mektepter úshin biryńǵaı ári birdeı bolyp tur», - dedi A. Aımaǵambetov.
Onyń aıtýynsha, bul norma osy maqsatty sheshýge jáne pedagogtar suranysyn eskere otyryp, tapsyrys berýge múmkindik beredi.
«Tek, biryńǵaı oqýlyqtar Qazaqstan tarıhy men Dúnıejúzilik tarıh boıynsha saqtalady. Bul oqýlyqtar biryńǵaı baǵdarlama boıynsha júredi. Qazirgi kezde tıisti jumystar pysyqtalyp jatyr», - dedi mınıstr.
Aıtpaqshy, «Altyn belgige» úmitkerler úshin talap kúsheıtiletin boldy.
«Biz ony kezeń-kezeńmen jyl saıyn ózgertip jatyrmyz. Ótken jyldary bul máseleni kóterip, biraz ózgerister engizdik. Bıyl endi ekinshi kezeń qamtylady. Ekinshi kezeń degenimiz, jyldyq «bes» baǵasymen qatar, úmitkerlerdiń 5-11 synyp aralyǵyndaǵy barlyq toqsandyq baǵalary da «5» bolýy kerek degen qaǵıda engiziledi. Ony óte mańyzdy qaǵıda dep sanaımyn. Sondyqtan osy sheshimdi de qabyldap otyrmyz», - dedi vedomstvo basshysy.
Belgili bolǵandaı, túlekter úshin emtıhandy táýelsiz uıym ótkizetin bolady.
Pedagog mártebesi
«Pedagog mártebesi týraly» Zań pedagog baǵytyna oqýǵa túsetinder deńgeıine óte jaqsy yqpal etken eken. Osy mamandyqty tańdaıtyn talantty balalar sany artty. Bıyl pedagogıkalyq baǵyttar boıynsha 9 066 grant taǵaıyndaldy. Ortasha ball 75-ke deıin artqanyna qaramastan, balalar kelip jatyr. Konkýrsqa 19 133 adam qatysty. Olardyń arasynda bir myńǵa jýyq talapker 130-dan astam ball jınaǵan. Shyn máninde úzdik talapkerler pedagog mamandyǵyn tańdaı bastady. Olardyń ishinde 20 paıyzǵa jýyǵy «Altyn belgi» ıegerleri bolyp otyr. Bıyl oqýǵa túskenderdiń ortasha baly da kúrt ósken. Bul óz kezeginde osy salanyń tartymdy bola bastaǵynan baıqatady.
Munymen qosa Ashat Aımaǵambetov muǵalimder biliktiligin arttyrý taqyrybyna da toqtalyp ótti.
«Qazirgi kezde biliktilikti arttyrýdyń ortalyqtary qaıta júkteý kezeńinen ótip jatyr. Bul kezeńde biliktilikti arttyrý kýrstarynyń mazmuny men sapasyna qadamdar tolyqtaı jańartylady. Olar ǵylymı ádistemege negizdelgen. Sonymen qatar, muǵalimder biliktiligin bes jylda bir ret emes, eki nemese úsh jylda bir ret ótkizý máselesin qarastyrýdy josparlap otyrmyz», - dedi mınıstr.
Onyń paıymynsha, bul qadamdar mańyzdy bolyp tur. Sebebi saladaǵy jaǵdaı óte qarqyndy ózgerip jatqan kezeńde pedagogtar biliktiligin turaqty arttyrýdy qamtamasyz etý mańyzdy.
Vedomstvo basshysy 2022 jyldyń qańtarynda balabaqsha men mektep, kolledj pedagogtarynyń jalaqysy taǵy 25 paıyzǵa ósetinin aıtty. Al 2021 jyldyń qyrkúıeginen pedagogtardy jumysqa qabyldaý júıesi ózgeredi. Bul taqyryp boıynsha talqylaý men pikiralmasýlar boldy. Talqylaý nátıjesinde tıisti buıryqqa jaqynda qol qoıyldy.
Osy oraıda buǵan deıin pedagogtardy jumysqa qabyldaýdy dırektor júrgizse, endi bul qadamdar elektrondy formatta konkýrs arqyly iske asyrylady. Bul rette naqty kórsetkishter men ólshemsharttar boıynsha mektep pen komıssııa pedagogty qabyldaý turǵysynda sheshim qabyldaıdy.
Taǵy bir jańalyq - mektep dırektorlaryna jalaqy tóleý júıesine ózgeris engiziledi.
«Qazirgi kezde mektep basshylyǵynyń jalaqy máselesi ózekti bolyp tur. Jalaqynyń qazirgi deńgeıine qarap, básekege qabiletti menedjerler basshylyq qyzmetke barýǵa qyzyqpaıdy. Jalpy, úzdik pedagogtar mektep dırektory nemese oqý isiniń meńgerýshisi laýazymyna barmaı jatady», - dedi Ashat Aımaǵambetov.
Osy oraıda mınıstr bul baǵytta tıisti ózgerister kerek ekenin atap ótti. Mektep dırektorlarynyń jalaqysy ustazdyń eńbekaqysynan tómen bolatyn jaǵdaılar jıi kezdesedi. Bul turǵyda táýekelder deńgeıi ártúrli ekeni belgili. Bul rette Bilim mınıstrligi mektep dırektorlaryna jalaqy tóleý júıesine ózgeris engizýdi josparlap otyr.
Aıta keteıik, bıyl kúzden bastap bilim berý uıymdary dırektorlaryn qyzmetke taǵaıyndaýdyń jańa júıesi engiziledi.
«2021 jyldyń qyrkúıeginen bilim berý uıymdary dırektorlaryn qyzmetke taǵaıyndaýdyń jańa júıesi engiziledi. Bul óz kezeginde balalar úılerine, mektepter men kolledjderge qatysty. Osyǵan qatysty kóptegen suraqtar bolǵan edi. Uıym jetekshisi bir orynda 25-30 jyl qatarynan qyzmet etetin oqıǵalar kezdesip jatady. Degenmen olardyń jumysynan nátıje bolmaıtyn jaǵdaılar da baıqalyp otyr. Sondyqtan taǵaıyndaýdyń jańa júıesi eń mańyzdy suraqtarǵa jaýap beredi dep oılaımyn», - dedi Bilim mınıstri.