Pedagog mártebesi týraly zańǵa qatysty halyqtan 2 myń usynys kelip tústi
ASTANA. QazAqparat - Elimizde pedagog mamandyǵyna oqýǵa túsetin stýdentterdiń shamamen 80 paıyzy - mejeli baldy jınaı almaǵandar. ıAǵnı joǵary bal jınaǵandar kóbine basqa mamandyqtardy tańdap ketedi. Óıtkeni muǵalimdikke búgingi qoǵamnyń qyzyǵýshylyǵy tómen, dep habarlaıdy QazAqparat Habar 24 agenttigine silteme jasap.
Osy olqylyqtyń ornyn toltyrý úshin elimizde «Pedagog mártebesi týraly» zań qabyldanbaq. Búginde onyń jobasy jan-jaqty talqylanyp, usynystar qarastyrylyp jatyr. Pedagog mártebesi týraly aıtqanda, túıini sheshilmegen talaı máseleniń bar ekeni belgili. Endi muǵalimderdiń quqyǵyn qorǵaıtyn osy qujat qabyldansa, ustazdardyń bedelin kóterip, mereıin ústem etpek.
Búgin Bilim jáne ǵylym mınıstrliginiń ókilderi men qalalyq jáne aýdandyq mektep muǵalimderi, ata-analar jáne kásipodaq músheleri bas qosyp, zań jobasyna qatysty birqatar usynysty ortaǵa saldy.
«Bir apta buryn ǵana bizge túsken usynystardyń sany 800-deı bolatyn. Mine búgin 2000-ǵa jetti. Azamattar mınıstrliktiń resmı saıtyna, áleýmettik jelidegi paraqshalaryna óz oı-pikirlerin jiberip jatyr. Árıne, usynystardyń kóbi pedagog júktemesine qatysty», - deıdi QR Bilim jáne ǵylym mınıstriniń keńesshisi Maırash Taıkenova.
Jıynda sóz bolǵan taqyryptyń biri - ata-analar men muǵalimderdiń qarym-qatynasy. Óıtkeni bala tárbıesi úshin bul da óte ózekti. Jıynǵa qatysqandar ata-analardyń pedagogtarǵa ústemdik jasap, jumysyna negizsiz aralasatynyn joqqa shyǵarmaıdy. Sondyqtan osy zańda pedagogtyń áleýmettik jaǵdaıyn jaqsartý ǵana emes, qoǵamdaǵy bedelin kóterý basty nazarǵa alynǵan.
Pedagog mártebesi týraly zań tujyrymdamasyna árbir qazaqstandyq óz usynysyn bildire alady. Al daıyndalǵan zań jobasy kelesi jyldyń maýsym aıynda kúshine enedi dep kútilýde.
