«Pedagog mártebesi týraly» zań jobasy muǵalimderdiń abyroıyn arttyrady - Saparbaev
NUR-SULTAN. QazAqparat - «Pedagog mártebesi týraly» zań jobasy muǵalimderdiń abyroıyn arttyrýǵa múmkindik beredi. Bul týraly búgin atalǵan zań jobasy talqylanǵan Úkimet otyrysynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.
«Elimizde tuńǵysh ret daıyndalǵan zań jobasy muǵalimderdiń bedelin, abyroıyn arttyrýǵa úlken múmkindik beredi. Eń negizgisi olardy qosymsha jumysqa yntalandyratyn bolady. Mınıstr Ashat Qanatuly (Bilim mınıstri Aımaǵambetov) aıtqandaı, bul zań jobasy elimizde qyzý talqylandy. Onyń ústine Memleket basshysy Qasym-Jomart Toqaev qatysqan tamyz keńesinde de úlken qoldaý tapty. Jalpy, boljam boıynsha osy zań jobasy eń keminde elimizde 500 myńǵa jýyq ustazdyń múddesin qorǵaıdy», - dedi Berdibek Saparbaev.
Sonymen qatar ol «Pedagog mártebesi týraly» zań jobasy qarjymen tolyq qamtamasyz etilgenin aıtty.
«Úsh jylǵa 930 mlrd teńgege jýyq qarjy qaralǵan. 50 jyldyń ishinde alǵash ret muǵalimderge tálimgerligi úshin, magıstr ataǵy úshin qosymsha aqy tólenetin bolady. Endi mınıstrliktiń negizgi mindeti - osy zań jobasyn der kezinde Parlamentte qorǵap, tezirek júzege asýyn qamtamasyz etý. Zań qabyldanǵannan keıin mánin, maqsatyn halyqqa túsindirip aıtýymyz kerek», - dedi Úkimet basshysynyń orynbasary.
