Pedagog mártebesi týraly zań oryndalýy úshin qoǵam bolyp belsendilik tanytýymyz kerek – mınıstr
«Memleket basshysy Qasym-Jomart Toqaev «Pedagog mártebesi týraly» Zańǵa qol qoıdy. Barlyq ustazdar qaýymyn osyndaı tarıhı sheshimniń qabyldanýymen quttyqtaımyn! Ózderińiz biletindeı, Prezıdent bıylǵy Tamyz keńesinde jáne Joldaýynda osy Zańnyń aıasynda ustazdardyń jalaqysyn eki ese ósirý, muǵalimderdiń júktemesin azaıtý, ózine tán emes jumystardan bosatý máselelerin qarastyrýdy tapsyrǵan bolatyn. Elbasymyz N.Nazarbaevtyń osy Zańdy daıarlaý boıynsha ustazdardyń jaǵdaıyn jaqsartý, qaǵazbasylyqtan, orynsyz eseptilikten bosatý jáne de taǵy da basqa ózekti tapsyrmalary tolyǵymen qamtyldy. «Pedagog mártebesi týraly» zań 21 baptan turady jáne jarty mıllıonnan astam ustazdyń jumysyna qatysty. Jalpy Zań tórt baǵytty qamtıdy: Birinshi - ustazdardyń quqyqtaryn keńeıtý jáne ózine tán emes jumystan bosatý, júktemesin azaıtý; ekinshi - muǵalimniń qyzmetine qoıylatyn talaptardy kúsheıtý; úshinshi - materıaldy emes stımýl tetikteri; tórtinshi - materıaldyq yntalandyrý», - dep jazdy mınıstr.
Sonymen qatar ol pedagog jumysyn yntalandyrýǵa baǵyttalǵan negizgi sharalarǵa toqtaldy. Onyń dereginshe, 2020 jyly jalaqy 25 paıyz ósip, 4 jyl ishinde eki ese artady. Jańa júıe boıynsha endi balabaqsha, kolledj pedagogtary da biliktilik sanaty úshin laýazymdyq jalaqydan 30 ben 50 paıyz aralyǵynda qosymsha aqy alady. Pedagog mindetine jatpaıtyn fýnktsııalarǵa tartýdan qorǵaý, orynsyz eseptilikten bosatý, pedagogterdiń balalaryna turǵylyqty jeri boıynsha mektepke deıingi uıymdarǵa birinshi kezekte oryn berý, tálimgerlik úshin mektep muǵalimderine ár aı saıyn qosymsha aqy ( 17 myń teńge) engiziledi. 2021 jyldan bastap mektep muǵalimderine bir stavka úshin sanalatyn oqý júktemesin 18 saǵattan 16 saǵatqa deıin tómendeıdi.
Ǵylymı-pedagogıkalyq baǵyttaǵy magıstr dárejesi úshin ár aı saıyn mektep ustazdaryna 10 AEK (25,5 myń teńge) mólsherinde ústeme aqy tólenip, synyp jetekshiligi jáne dápter teksergeni úshin tólenetin aqy eki esege artady. Biliktilik sanaty úshin mektep dırektorlary men olardyń orynbasarlarynyń jalaqysyn 30 dan 100 paıyzǵa deıin qosymsha aqy tólep arttyrý qolǵa alynady. Áskerı qyzmetke shaqyrý keıinge qaldyrylady. Halyqaralyq konkýrsttar men jarystardyń jeńimpazdaryn, túrli olımpıadalarmen sporttyq jarystardyń laýreattaryn daıarlaǵan pedagogterge 3 laýazymdyq jalaqyǵa deıin birjolǵy syıaqy tólenedi . «Qazaqstannyń eńbek sińirgen ustazy» memlekettik marapat taǵaıyndalady jáne ıegerlerine 1000 AEK mólsherinde birjolǵy syıaqy beriledi. 42 kún demalatyn pedagogterdiń demalys ýaqyty 56 kúnge uzartylady. Taǵa da basqa jańa bastamalar qarastyrylǵan.
«Eń bastysy Zań qarjymen tolyǵymen qamtamasyz etildi. Jalpy, 2024 jylǵa deıin 5 trıllıon 3 mıllıard teńge osy normalardy júzege asyrý úshin bıýdjetten bólinedi. Budan basqa, ilespe zańda ata-ananyń jaýapkershiligin arttyrý, bala quqyǵyn qorǵaý, ustazdarǵa ádepsiz minez-qulyq kórsetkeni úshin, orynsyz eseptilik, qaǵazbasylyq, zańsyz tekserister úshin naqty sanktsııalar, ıaǵnı aıyppuldar qarastyryldy. Endigi kezekte, Zań talaptarynyń oryndalýy barysynda qoǵam bolyp belsendilik tanytýymyz kerek. Elimizdegi muǵalimderdiń bedelin, abyroıyn arttyrýǵa úlken múmkindik beretin jańa Zań ustazdarymyzdyń mereıin ósirip, mártebesin arttyra túsetinine senimdimin. Mınıstirlik Zańnyń oryndalýyn tikeleı baqylaýynda ustaıdy. Jalpy, atalmysh Zań bilim sapasynyń artýyna tikeleı áser etetin bolady», - dedi Ashat Aımaǵambetov.
