Pedagog mártebesi týraly zań Senatqa jiberildi
ASTANA. KAZINFORM – Májiliste «QR keıbir zańnamalyq aktilerine pedagog mártebesi jáne bilim berý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qabyldanyp, Senatqa jiberildi. Oǵan qosa, Ákimshilik quqyq buzýshylyq týraly kodeksine pedagog mártebesi máseleleri boıynsha ózgerister engiziletin boldy.
Májilis depýtaty Janarbek Áshimjannyń aıtýynsha, birinshi oqylymnan keıin zań jobalaryn jetildirý úshin aýqymdy jumys atqaryldy. Depýtattar aıtqan túzetýler zańnyń qoldaný aıasyn keńeıtip, onyń mazmunyn sapalyq turǵydan jańa deńgeıge kóterdi.
Qaralatyn máselelerdiń aýqymy men mańyzdylyǵyn eskerip, zań jobasynyń ataýyn «Pedagog mártebesi, bilim berý, densaýlyq saqtaý jáne balanyń quqyqtaryn qorǵaý máseleleri boıynsha QR keıbir zańnamalyq aktilerine ózgerister men tolyqtyrýlar engizý týraly» dep ózgertý usynylǵan.
– Zań jobasynyń ózegi – pedagog mártebesin naqty qorǵaý. Usynylǵan normalar muǵalimdi artyq júktemeden aryltyp, onyń kásibı erkindigin qamtamasyz etedi. Endi pedagogterdiń bilim alýshylar aldyndaǵy jaýapkershiligi tek oqý protsesi barysynda ǵana aıqyndalady. Bul muǵalimdi ózine tán emes fýnktsııalardan qorǵaıdy, - dedi J. Áshimjan Májilistiń jalpy otyrysynda.
Sondaı-aq zań jobasynda qaǵaz jáne elektrondyq formatta qatar júretin «tsıfrlyq bıýrokratııaǵa» zańnamalyq deńgeıde tyıym salynady.
Talantty mamandardy qoldaý maqsatynda halyqaralyq kásibı sheberlik konkýrstarynyń jeńimpazdaryna joǵary oqý oryndaryna konkýrstan tys grant taǵaıyndaý normasy qarastyryldy.
– Biz bilim berý ortasyn retteýde batyl qadamdar jasap, orta bilim berý uıymdarynda uıaly qurylǵylardy paıdalanýdyń biryńǵaı qaǵıdalaryn bekittik. Bul oqýshy nazaryn bilimge aýdarýǵa jáne kıberbýllıngtiń aldyn alýǵa septigin tıgizedi, - dedi Májilis depýtaty.
Balanyń ómiri, densaýlyǵy men qaýipsizdigi úshin ata-analardyń jaýapkershiligi de keńeıtildi. Bilim men tárbıe – tek mekteptiń ǵana emes, otbasy men memlekettiń ortaq isi ekeni naqty aıqyndaldy.
Zań jobasynda pedagogıkalyq jáne medıtsınalyq mamandyqtar boıynsha stýdentterdi qabyldaý men aýystyrý talaptary qatańdatyldy. Bul salalarǵa eń úzdik, bilimdi jastardyń kelýin qamtamasyz etý kózdelip otyr.
Sonymen birge, Qazaqstan aýmaǵynda jetekshi sheteldik joǵary oqý oryndarynyń erkin qyzmet etýi úshin qolaıly quqyqtyq rejım bekitildi. Bul – bolashaqta elimizdi óńirlik bilim habyna aınaldyrýdyń mańyzdy tetigi bolmaq.
– Talqylaý barysynda densaýlyq saqtaý máseleleri jeke blok retinde engizildi. Onda medıtsınalyq bilim berýdi jetildirý, densaýlyq saqtaý nysandaryn salý men paıdalanýda memlekettik-jekeshelik áriptestik tetikterin tıimdi qoldaný normalary qarastyryldy. Pedagogterdiń zańdy múddelerin qorǵaý maqsatynda Ákimshilik quqyq buzýshylyq týraly kodekske engizilgen túzetýler negizgi zańmen tolyq sáıkestendirildi. Bul zańnyń oryndalýyn baqylaıtyn naqty tetik bolmaq, – dedi Janarbek Áshimjan.
Aıta keteıik, elimizde pedagogterdiń tsıfrlyq júktemesine aýdıt júrgizilip jatyr.
