Pedagog mártebesi týraly túzetýler ata-ananyń jaýapkershiligin arttyrady — depýtat
ASTANA. KAZINFORM — Mektep muǵalimderi bos ýaqytyn óz qyzmetin jetildirýge arnaýy kerek. Al balaǵa mektepten tys ýaqytta ata-ana jaýapty bolýǵa tıis. Parlament Májilisiniń depýtaty Nurgúl Taý pedagog mártebesi týraly zańǵa tolyqtyrýlar jóninde pikirin bildirdi.
Depýtattyń aıtýynsha, alǵash ret 2007 jyly Bilim týraly zańǵa ózgerister engizilip, pedagog quqyǵyn qorǵaıtyn talaptar paıda boldy. Al pedagog mártebesi týraly arnaıy zań 2019 jyly qabyldandy.
— Qazirgi sol zańǵa túzetýler engizý kózdelip otyr. Sebebi zań zaman talabyna saı jetildirip otyrýy kerek. Qazirgi zań jobasynyń basty qaǵıdaty — pedagogterdi shamadan tys júktemeden aryltý, óz qyzmetine jatpaıtyn jumystarǵa tartpaý. Onyń avtorlary — burynǵy mınıstr Ashat Aımaǵambetov pen Qudaıbergen Beksultanov. Rasynda da biz pedagogty shamadan tys júkteýge qarsymyz. Olar tek óz qyzmetimen aınalysýy kerek, — dedi Májilis depýtaty Jibek Joly telearnasyna bergen suhbatynda.
Sonymen birge, jańa zań jobasynda oqýshylardyń da, pedagogterdiń da sabaqta smartfon ustaýyna tyıym salynýy múmkin. Bul bastama bilimniń sapaly berilýi men balalardy býllıngten qorǵaý úshin usynylyp otyr jáne mınıstrliktiń arnaıy buıryǵymen qosymsha bekitiledi.
— Jańa túzetýde muǵalimniń jaýapkershilik ýaqytyn naqty kórsetý kózdelip otyr. Sebebi qazir barlyq jaýapkershilikti muǵalim men mektepke ilip qoıdyq. Ata-ana jaýapkershiligi kóleńkede qalyp otyr. Máselen, AQSh mektepteriniń aldynda arnaıy qyzyl syzyq bar. Sol syzyqtan asqan soń balaǵa mektep ákimshiligi jaýap bermeıdi. Biz de ana-ata jaýapkershiligin kóbeıtýge basymdyq beremiz. Al muǵalim bos ýaqytyn óz qyzmetin jetildirýge arnaýy kerek. Balamen qarym-qatynasty zerttep, bilimin damytýy kerek, — dedi Nurgúl Taý.
Eske sala ketsek, Májilisiniń qaraýyna «QR keıbir zańnamalyq aktilerine pedagog mártebesi jáne bilim berý máseleleri boıynsha ózgerister men tolyqtyrýlar engizý týraly» zań jobasy engizildi.
Endi muǵalimder oqýshynyń ómiri men densaýlyǵyna tek oqý protsesi kezinde jaýapty bolmaq.