Pedagog mamandyǵy úzdiksiz bilim alý men óz-ózińdi jetildirýdi talap etedi - Sholpan Babaeva
- Sholpan Muhamedıqyzy, bul mamandyqqa qalaı keldińiz, tańdaý jasaýyńyzǵa ne túrtki boldy ?
- Jalpy, pedagogtar áýletinen shyqqanmyn, eńbek ótilimizdi qossaq, ǵasyrdan asyp jyǵylady. Bastapqyda ІT-salasyndaǵy mamandyqty tańdap, 7 jyl ınjener-baǵdarlamashy bolyp jumys istedim. Alaıda, bilim salasynda eńbek etý mańdaıyma jazylǵan eken. Mine, sońǵy 10 jyl boıy Nur-Sultan qalasynyń Kólik jáne kommýnıkatsııa kolledjiniń «Esepteý tehnıkasy jáne baǵdarlamalyq qamtamasyz etý kafedrasynyń arnaýly mamandyqtar pánderiniń oqytýshysymyn. Jańa dúnıeni zerdeleý, óz bilimiń men tájirıbeńdi bólisý barlyq ýaqytta da janymnyń qalaýy. Al pedagog mamandyǵy úzdiksiz bilim alý jáne óz-ózińdi jetildirý ekendigi sózsiz. Ásirese, bul óte ýaqyt ótken saıyn óte jyldam ózgerip otyratyn aqparattyq tehnologııalar salasyna qatysty bolsa.
- Ustazdar qaýymy Memleket basshysy Qasym-Jomart Toqaevtyń pedagogtardyń mártebesin arttyrý, olardyń materıaldyq jaǵdaıyn jaqsartý jónindegi bastamalaryn qalaı qabyldady ?
- Óte jaqsy, zor qýanyshpen qabyldady. Óıtkeni, atalǵan zań kásibı pedagogtardyń quqyǵynyń kepili bolyp otyr. Osy jyldan bastap tehnıkalyq jáne kásiptik bilim berý salasyndaǵy pedagogtarǵa sanattaryna baılanysty ústemaqy tólene bastady. Al bul jalaqyǵa aıtarlyqtaı ústeme boldy. Sonymen qatar bul bastamalar oqytýshylardy yntalandyra tústi. Óıtkeni, olardyń eńbekteri laıyqty deńgeıde baǵalanady.
- Koronavırýs pandemııasyna baılanysty bilim berý salasynda problemalar týyndaǵany belgili. Osyǵan oraı Memleket basshysy da Úkimetke birqatar tapsyrma bergen bolatyn. Al muǵalimder ortasynda osyǵan qatysty qandaı paıym bar ?
- Iá, bastapqyda problemalardyń bolǵany ras. Óıtkeni, qysqan ǵana ýaqyttyń ishinde qashyqtan oqytý formatyna kóshýge týra keldi. Biraq, qalanyń barlyq tehnıkalyq jáne kásiptik bilim berý uıymdary jaǵdaıǵa tez arada beıimdelip, bilim berýdi qashyqtan oqytý formatyna óte aldy. Al bizdiń kolledjge keler bolsaq, aıtarlyqtaı qıyndyqtar týyndaǵan joq. Barlyǵy da oqý-ádistemelik bólimmen jáne aqparattyq tehnologııalar qyzmetimen saýatty uıymdastyryldy. Kolledj ákimshiligi oqytýshylarǵa da, stýdentterge de qajetti kómekti jan-jaqty kórsete bildi.
- Pandemııamen baılanysty shekteýler pedagogtardyń jumysyna, bilim sapasyna qanshalyqty áser etti ?
- Shekteýlerdiń jumysqa áser bar ekendigi sózsiz. Pedagogtar stýdentterge bilim berý úshin únemi jańa ádister izdeýine týra keldi. Al stýdentterden ózdiginen bilim alý talaby kúsheıdi. Óıtkeni, olar bilimniń 80 paıyzyn derbes alýlaryna týra keldi. Internetke qoljetimdilikke baılanysty da máseleler týyndap jatty. Munyń ústine pedagogtarǵa tekseretin jumystardyń eselene túsýine baılanysty júkteme de artty.
Pandemııa kezinde alynǵan bilim deńgeıiniń tómendigine baılanysty qazirgi ýaqytta sol olqylyqtardy toltyrýǵa baǵyttalǵan is-sharalar júzege asyrylyp jatyr. Ony QR Bilim jáne ǵylym mınıstri Ashat Aımaǵambetov te sóz sóıleýlerinde aıtyp jur.
- Muǵalimder kúni qarsańynda pedagog mamandyǵyn tańdaǵan jastarǵa, jalpy áriptesterińizge qandaı tilegińiz bar ?
- Olardyń barlyǵyna shydamdylyq pen shabyt, qyzyqty ıdeıalarynyń júzege asyrylýyn tileımin! Shákirtteri ózderiniń jetistikterimen, tabystarymen qýanta bersin! Ómirlik ustanymdary qalaǵan nátıjelerin berip, keleshekteri kemel bolýy úshin zor múmkindikter ashsyn.
Suqbatyńyzǵa raqmet! Merekeńizben!