Pedagog-assıstentter jumysqa konkýrssyz qabyldanbaq
ASTANA. KAZINFORM – Bıyl elimizdegi 9 kolledjde «pedagog-assıstent» mamandyǵy boıynsha oqýǵa qabyldaý júrgiziledi. Bul jaıynda Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Pedagog-assıstentterge qoıylatyn biliktilik talaptary Pedagog laýazymdarynyń úlgilik sıpattamasymen bekitilgen. Biliktilikke qoıylatyn talaptar joǵary, sonymen qatar tehnıkalyq jáne kásiptik, orta bilimnen keıingi bilimniń bolýyn kózdeıdi. 2024 jyldyń jeltoqsanynda pedagog-assıstent laýazymy bilim berýdiń barlyq deńgeıine engizildi. Búginde olardyń sany 6,5 myń mamannan asady, - dedi Úkimet basshysy.
Onyń málimetinshe, tehnıkalyq jáne kásiptik bilim berý baǵdarlamasynyń tizilimine 9 kolledjde pedagog-assıstent daıyndaý boıynsha 18 baǵdarlama engizilgen. Qazirgi ýaqytta atalǵan 9 kolledjdiń ekeýi lıtsenzııa alsa, 7 kolledj lıtsenzııalaý protsesinen ótip jatyr.
- 2026 jyly atalǵan kolledjderde «pedagog-assıstent» mamandyǵy boıynsha oqýǵa qabyldaý júrgiziledi. Qazirgi ýaqytta pedagog-assıstentterdi jumysqa qabyldaý barysynda konkýrstyq protsedýralardan ótýden bosatý boıynsha jumys júrgizilip jatyr, - dedi Oljas Bektenov.
2025-2026 oqý jylynyń basyna Qazaqstanda 559 kolledj jumys istedi.