Paıyzsyz depozıt pen «jasyl» ıpoteka: «Otbasy bank» jańa ónimderdi iske qosady
ASTANA. KAZINFORM – Qazaqstanda turǵyn úıdi qarjylandyrý tetikteri ıslamdyq jáne «jasyl» ónimder arqyly keńeıtiledi. Jańa baǵdarlamalar paıyzsyz qarjylandyrý qaǵıdattaryna jáne ekologııalyq ıpotekalyq sheshimderdi damytýǵa negizdeledi. Bul týraly «Otbasy bank» AQ basqarma tóraıymy Lázzat Ibragımova BIZDIÑ ORTA podkastynda aıtty.
«Otbasy bank» Azııa damý bankinen shamamen 90 mlrd teńge kóleminde qarjy tartpaq. Lázzat Ibragımovanyń aıtýynsha, bul – halyqaralyq qarjy ınstıtýtynyń bankke degen seniminiń kórsetkishi. Sebebi mundaı uıymdar ınvestıtsııa salatyn jobalardy muqııat irikteıdi.
Qarajattyń bir bóligi «Umaı» áıelder ıpotekasy baǵdarlamasyna jáne «Jasyl ıpotekany» damytýǵa baǵyttalady. Onyń sózinshe, «Otbasy bank» Qazaqstanda ekologııalyq ıpotekalyq ónimderdi alǵash engizgen qarjy uıymdarynyń biri.
– Biz qazaqstandyq otbasylardyń shyǵynyn jiti baqylap otyrmyz. Sońǵy jyldary kommýnaldyq tólemderdiń aıtarlyqtaı óskenin baıqap kelemiz, - dedi Lázzat Ibragımova.
Onyń aıtýynsha, turǵyn úı-kommýnaldyq sharýashylyq salasyndaǵy reformalar memleket pen menshik ıelerinen jańa ınfraqurylymdyq shyǵyndardy talap etedi. Bul óz kezeginde tarıfterdiń qymbattaýyna áser etýi múmkin.
– Biz alǵashqylardyń biri bolyp turǵyn úıdiń energııa tıimdiligi máselesin kóterdik. Bolashaqta mundaı baspanalar suranysqa ıe bolady. Sebebi aı saıyn jaryq pen jylýǵa 13 myń teńge tóleý men 26 myń teńge tóleýdiń aıyrmashylyǵy otbasylyq bıýdjetke aıtarlyqtaı salmaq túsiredi, - dedi ol.
Osyǵan baılanysty bank energııany únemdeıtin materıaldardy qoldanatyn qurylys kompanııalaryn qoldaı bastaǵan. Qazirgi tańda keı turǵyn úıler ortalyq jylý nemese elektr júıesine qosylmaı, avtonomdy júıeler arqyly qamtamasyz etiledi.
– Keı jaǵdaıda ıpoteka tólemi 150 myń teńge bolsa, kommýnaldyq jáne qyzmet kórsetý shyǵyndary taǵy 160 myń teńgege jetýi múmkin. Bul otbasy úshin ekinshi úlken qarjylyq júktemege aınalady, - dedi «Otbasy bank» AQ basqarma tóraıymy.
Ol «Otbasy banktegi» ıpotekalyq tólem búkil merzim boıy ózgerissiz qalatynyn, al kommýnaldyq tarıfter ýaqyt óte ósetinin aıtty. Sondyqtan energııa tıimdi turǵyn úı máselesi qazir erekshe ózekti bolyp otyr.
Sonymen qatar bank «Jasyl ıpoteka» baǵdarlamasy boıynsha mólsherlemeni tómendetýdi josparlap otyr.
– Buǵan deıin syıaqy mólsherlemesi jylyna 12,5–14,5% aralyǵynda boldy. Qazirgi naryq jaǵdaıynda bul joǵary kórsetkish sanalady. Sondyqtan mólsherlemeni tómendetý boıynsha jumys júrip jatyr. Baǵdarlamany iske qosý maýsym aıyna josparlanyp otyr, - dedi Lázzat Ibragımova.
Sondaı-aq ol qazir ıslamdyq ıpoteka ónimderi belsendi túrde zerttelip jatqanyn aıtty. Qarjy naryǵyn retteý jáne damytý agenttigi birinshi oqylymda «Kredıttik reıtıng agenttigi týraly» zań jobasyn usynǵan. Qosymsha normalarǵa sáıkes, «Otbasy bankke» ıslamdyq qarjylandyrýmen aınalysý quqyǵy beriledi. Zańǵa maýsym aıynyń sońyna deıin qol qoıylady dep kútilip jatyr.
– Lıtsenzııa rásimdeý tamyz aıyna deıin sozylýy múmkin. Al qyrkúıekte nemese eń keshi 1 qazanǵa deıin ıslam qaǵıdattaryna negizdelgen jańa ónim tanystyrylady dep josparlanyp otyr, - dedi ol.
Lázzat Ibragımova ıslamdyq qarjylandyrý júıesinde paıyz alýǵa tyıym salynatynyn atap ótti. Sondyqtan bank paıyzsyz depozıtter men paıyzsyz nesıeler usynýdy kózdep otyr. Degenmen qarjylyq model saqtalady, tek jumys isteý tetigi dástúrli paıyzdyq júıeden ózgeshe bolady.
Aıta keteıik, buǵan deıin Lázzat Ibragımova aldaǵy jyldary baspana baǵasy tómendemeıtinin aıtqan bolatyn.
