Paıyzy tym joǵary: Quryltaıda kásipkerlikke jeńildetilgen nesıe júıesin engizý usynyldy

ASTANA. KAZINFORM — Májilis depýtaty, qoǵam qaıratkeri Nurtaı Sabılıanov Qyzylordada ótip jatqan V Ulttyq quryltaıda kásipkerlikke beriletin nesıeniń paıyzdyq mólsherlemesi tym joǵary ekenin aıtyp, jańa jeńildetilgen nesıe júıesin engizýdi usyndy.

Keshe N. Sabılıanov, O. Sábdenov, J. Qulekeev, Q. Arystanbekov, A. Kúrishbaev syndy qoǵam qaıratkerleri Quryltaıdyń 21 múshesi ekonomıkalyq damý sektsııasyn ótkizgen. Sektsııada ekonomıkaǵa qatysty aımaqtardyń damýy boıynsha birqatar bastama kóterildi.

— Búgingi jıyn arqyly el ishindegi birqatar túıtkildi máselege toqtalǵym keledi. Birinshi, shaǵyn jáne orta kásipkerlikti damytý arqyly ekonomıkada ósimdi qalyptastyrý. Qazir bankter kásipkerlikke nesıe berý kezinde 25 paıyzdyq mólsherleme qoldanady. Bul kásipkerler úshin qolaısyz jáne bıznesti damytý múmkindigin shekteıdi. Sol sebepti kásipkerlikti qoldaý maqsatynda jeńildetilgen nesıe júıesin engizý kerek dep esepteımin, — dedi N. Sabılıanov Prezıdent qatysýymen ótip jatqan V Ulttyq quryltaıda.

Depýtattyń aıtýynsha, muny damý ınstıtýttary men bankterdiń qarajatyn úılestirý arqyly júzege asyrýǵa bolady.

— Sondaı-aq memleket tarapynan bıznesti qoldaýǵa bólinetin qarajatqa, beriletin jeńildikterge tsıfrlyq platforma arqyly jyl saıyn onyń tıimdiligine, ekonomıkaǵa áserine taldaý men baqylaý júrgizý qajet. Óıtkeni jańa jumys oryndaryn ashý, óndiristi damytý sııaqty bıznesti qoldaýdyń memleketke qaıtarymy bolýy kerek, — dedi N. Sabılıanov.

Aıta keteıik, Qyzylordada Memleket basshysy Qasym-Jomart Toqaevtyń qatysýymen Ulttyq quryltaıdyń besinshi otyrysy bastaldy. Quryltaıdaǵy talqylaýǵa tanymal memleket jáne qoǵam qaıratkerleri, saıası partııalardyń, úkimettik emes sektordyń, bıznes-qaýymdastyqtardyń, saraptamalyq qaýymdastyqtyń jáne oblystardyń qoǵamdyq keńesteriniń ókilderi keldi.

Buǵan deıin Májilis depýtaty Ulttyq quryltaı jańadan qurylǵan oblystardyń damýyna aıryqsha serpin bergenin, el tarıhynda alǵash ret shekaralyq aýmaqtardy damytýǵa arnalǵan zań ázirlengenin aıtqan edi.