Paıyzy az nesıe alyp beremin dep elýge jýyq adamdy aldap ketken alaıaq ustaldy

ASTANA. KAZINFORM — Astana qalasynda memlekettik baǵdarlama aıasynda nesıe alyp berýge kómektesemin degen jeleýmen jasalǵan alaıaqtyq deregi áshkerelendi, dep habarlaıdy Polisia.kz.

Aldyn ala tergeý barysynda kúdiktiniń azamattardyń senimine kirip, bank arqyly jeńildetilgen nesıe rásimdep beremin dep ýáde berip, túrli syltaýlarmen aqshalaı qarajat alǵany anyqtaldy.

Atap aıtqanda, ol qujattardy daıyndaý, bank qyzmetkerlerine kómek kórsetý, kepildik rásimdeý jáne ózge de qyzmetterdi syltaý etip, jábirlenýshilerden iri kólemde aqsha jınaǵan.

Atalǵan qylmystyq áreketterdiń saldarynan keltirilgen materıaldyq shyǵyn 7 mln teńgeden asady. Qazirgi tańda bul derek boıynsha 50-ge jýyq alaıaqtyq epızod tirkelip, olardyń barlyǵy bir azamattyń áreketimen baılanysty ekeni anyqtaldy.

Qazirgi ýaqytta kúdiktige qatysty sotqa deıingi tergep-tekserý amaldary júrgizilip, onyń basqa da osyǵan uqsas qylmystarǵa qatysy bary tekserilip jatyr. Tergeý aıasynda jábirlenýshilerdiń sany artýy da múmkin.

Polıtsııa azamattarǵa memlekettik jáne qarjylyq baǵdarlamalarǵa qatysý kezinde barynsha saq bolýdy, nesıe rásimdeý máseleleri boıynsha tek resmı bankter men ýákiletti uıymdarǵa júginýdi eskertedi. Beıtanys tulǵalarǵa nemese deldaldarǵa aqsha berý alaıaqtyqqa ákep soǵýy múmkin.

Aıta keteıik, Shymkentte polıtsııa qyzmetkerleriniń jedel-izdestirý is-sharalarynyń nátıjesinde asa iri mólsherde jasalǵan alaıaqtyq úshin halyqaralyq izdeýde bolǵan kúdikti ustaldy. Onyń turǵyndarǵa keltirgen jalpy materıaldyq shyǵynynyń kólemi 80 mıllıon teńgeden asady.