Paıǵambarymyz (s.ǵ.s.) meshitinde 2,8 mıllıon adam qulshylyq etedi
ASTANA. 3 qazan. QazAqparat - Saýd Arabııasynyń koroli Abdolla ben Abdýlazız Mádınadaǵy Paıǵambarymyz (s.ǵ.s.) meshitiniń kólemin ulǵaıtý maqsatynda qurylys jumystarynyń resmı túrde bastalýyna ruqsat berdi.
QMDB málimetinshe, Allah qalasa, 2040 jyly qulshylyq úıi tolyq paıdalanýǵa beriledi de josparlanýda. Ǵıbadat úıiniń alǵashqy kezeńi aıaqtalǵanda qosymsha 800 myń musylman bir mezgilde namazǵa tura alady. Ekinshi kezeńinde taǵy da osynshama adam qulshylyq ete alady.
Meshit aınalasyndaǵy jer telimderin satyp alýdyń ózine 6,5 mıllıard AQSh dollaryn jumsaý qarastyrylǵan. Sondaı-aq, ǵıbadathananyń janyna 23 alyp qonaqúıler salý da bas josparǵa engizilgen.
Saýd Arabııasy bıligi Mádınadaǵy Paıǵambarymyzdyń (s.ǵ.s.) meshitin jańǵyrtýmen qatar Mekkeniń de ınfraqurylymyn damytýdy qolǵa almaq. Ol boıynsha jańadan qonaqúıler boı kóterip, jerasty joldary iske qosylady.
