Paıǵambarǵa baǵyný, ony dúnıedegi barlyq nárseden, tipti óz janymyzdan da artyq kórý, onyń súnnetin ustaný, ımandy jandardyń musylmandyq boryshy - Bas múftı
ALMATY. 2 aqpan. QazAqparat - Máýlit merekesin atap ótý búkil elimizde qalyptasqan ıgi, izgi dástúrge aınaldy. Ony Qazaqstan musylmandary dinı basqarmasynyń tóraǵasy, Bas múftı, sheıh Ábsattar qajy Derbisáli búgin Respýblıka saraıynda ótip jatqan Máýlit merekesi kezinde aıtty.
«Adamzat tarıhyna zer salsaq, jer betindegi ómirdiń paıǵambarlardan bastalǵanyn baıqaımyz. Shynynda da jaratýshy ıemizdiń elshileri bolmasa dinniń de, jalpy tirshiliktiń de tolyqqandy máni ashylyp, maqsaty aıqyndalýy múmkin emes. Sondyqtan sonaý alǵashqy adamnyń jaratylysynan beri árbir qaýymǵa Allanyń elshisi-paıǵambary jiberilip otyrylǵan. Mine búgin biz sol paıǵambarlar kóshiniń eń sońǵysy, biraq bir qaýymǵa emes, búkil adamzatqa jiberilgen meıirim jarshysy, eki dúnıeniń sultany Muhammed Mustafa álık salamnyń dúnıege kelgen kúnin merekeleý úshin jınalyp otyrmyz», - dedi Ábsattar qajy.
Bas múftıdiń aıtýynsha, paıǵambarǵa baǵyný, ony dúnıedegi barlyq nárseden, tipti óz janymyzdan da artyq kórý, onyń súnnetin ustaný, ımandy jandardyń musylmandyq boryshy. Alla taǵala barlyq paıǵambarlarǵa mindetti túrde qabyl bolatyn bir duǵa jasaýǵa mursat berdi. Ózge paıǵambarlar ony osy dúnıede qoldandy. Al meıirim sultany Muhammed paıǵambar s.ǵ.s. bul múmkindikti ózi úshin emes, qııamet kúni haq táńirge túsetin úmmetiniń shapaǵaty úshin saqtap qaldy. Óıtkeni onyń óz úmmetine degen meıirimi erekshe boldy.
