Paıǵambar meshitin keńeıtý jumysy qajylyq merziminen keıin bastalmaq
ASTANA. 26 shilde. QazAqparat - Bıyl qajylyq merzimi aıaqtalǵan soń Mádına qalasyndaǵy kıeli oryndar aýqymdy qaıta jańartýdan ótedi. Bul jaıynda Qajylyq jónindegi mınıstrliktiń bas meńgerýshisiniń orynbasary Muhammed ál-Arabı Bernama agenttigine habarlady.
Atalmysh joba úsh jylǵa shaqtalǵan jáne kıeli oryndardy táý etip kelgen qajylardyń qamy úshin qolǵa alynyp otyr.
Mádına shaharyndaǵy Paıǵambarlar padıshasynyń (Allanyń ıgiligi men sálemi jaýsyn) meshitin keńeıtý josparyn Saýd Arabııasynyń koroli maquldady. Eger 800 myń adamǵa shaqtalǵan atalmysh qulshylyq úıi josparǵa sáıkes keńeıtiletin bolsa, bir mezgilde 1,6 mln adamǵa deıin ǵıbadatyn óteı alatyn bolady.
Muslim.kz saıtynyń jazýynsha, qazirgi ýaqytta Mekke qalasyndaǵy «ál-Haram» meshiti de keńeıtilip jatyr. Súrilip tastalǵan birqatar nysannyń esebinen qajylar Qaǵbaǵa táý etetin alań keńeıtiletin bolady. Bir mezgilde 48 myń adam táý ete alatyn onyń syıymdylyǵy 130 myń adamǵa deıin artady.
