Paıdaly qazbalardy zańsyz alýshylar 5 jylǵa sottalýy múmkin
QARAǴANDY. QazAqparat - Qaraǵandy oblysynda kásipkerlerdiń shaǵymdarynan soń jer qoınaýyn zańsyz qazýshylarmen kúres údetildi. Segiz qylmystyq is qozǵalyp, 20-dan astam materıal sheshim qabyldaý úshin polıtsııa men Ekologııa departamentine jiberildi, dep habarlaıdy QazAqparat.
Qaraǵandy oblysy ákiminiń baspasóz qyzmetinen málim etkendeı, bul suraq mamyr aıynda aımaq basshysy janyndaǵy Kásipkerlik máseleler jónindegi komıssıda kóterilgen. Sodan keıin bılik ókilderi jumys tobyn qurǵan, onyń quramyna quqyqqorǵaý jáne kúsh organdary, jer qoınaýyn paıdalanýshylardyń ókilderi endi.
«Paıdaly qazbalardy zańsyz túrde qazýdyń aldyn alý úshin Jol kartasyn qurǵan bolatynbyz. Aýyldyq ákimdikter men ýchaskelik ınspektorlardan bastap barlyq memlekettik organdar bul baǵytta jumystaryn údetti. Reıdterdiń nátıjesinde maýsymnan bastap jer qoınaýyn zańsyz qazýdyń 30 deregi tirkeldi», - dep málimdedi oblys ákiminiń orynbasary Serik Shaıdarov Investıtsııalardy jumyldyrý jáne aımaqtyń ınvestıtsııalyq klımatyn jaqsartý boıynsha keńes pen Kásipkerlik máseleler jónindegi komıssııanyń birlesken otyrysynda.
Atap ótilgendeı, qylmystyń aýmaǵy keń: Jezqazǵannan bastap Nura aýdanyna deıin. Eń kóp derekter Buqar jyraý aýdanynda tirkelgen (10).
Segiz fakti boıynsha QR QK-niń 334-babymen («Jer qoınaýyn óz betinshe paıdalaný») qylmystyq ister qozǵaldy. Bul qylmys úshin bes jylǵa deıin bas bostandyǵynan aıyrý nemese úlken somada aıyppul qarastyrylǵan (keltirilgen shyǵynǵa baılanysty 3 myń aılyq eseptik kórsetkish kóleminde).
«Shaǵymdarymyz nazarǵa alynyp, áreketter qolǵa alyndy. Qazir jaǵdaı túbegeıli ózgerdi. Úlken kólemdi ekskavatorlar men júk tıeýshi tehnıkany qoldana otyryp, ashyq túrde jer qoınaýyn tonaý derekteri joq», - dedi kásipker Aleksandr Kıký.
Onyń aıtýynsha, Qaraǵandy oblysynda qum-qıyrshyq tas qospasyna suranys 60% artqan. Ol qurylys naýqanynyń qarqynymen baılanysty. Zańsyz básekelestikti joıý barlyǵyna teń oń áserin etýde.
Oblys ákimi Erlan Qoshanov bul jumysty júıeli túrde áli de jalǵastyrýdy tapsyrdy.
