Paıdaly qazbalar salasyna ınvestıtsııalyq ahýaldy jaqsartatyn qujat qabyldandy
ASTANA. QazAqparat - Búgin Parlament Senatynyń jalpy otyrysynda palata depýtattary «Jer qoınaýy jáne jer qoınaýyn paıdalaný týraly» Kodeks jobasy men ilespe zań jobasyn eki oqylymda qarap, qabyldady, dep habarlaıdy QazAqparat.
«Jobada qatty paıdaly qazbalar qorlary men kómirsýtek shıkizat qorlary boıynsha esep berýdiń CRIRSCO halyqaralyq standarttar júıesin engizý arqyly jer qoınaýyn paıdalaný salasynyń ashyqtyǵy men boljamdylyǵyn arttyrý kózdelgen. Sondaı-aq eń úzdik álemdik tájirıbeni paıdalana otyryp, barlyq paıdaly qazbalar úshin kelisimshart jasasýdyń ońtaılandyrylǵan tásili engizildi. Bul qujat salalyq qaýymdastyqtyń jáne bıznes ókilderiniń qatysýymen ázirlendi. Kodeks jobasy jer qoınaýyn paıdalanýshylardyń jumysynda kezdesetin kedergilerdi joıyp, salanyń quqyqtyq bazasyn jetildirýge, halyqaralyq standarttarǵa ótýge jáne ınvestıtsııalyq klımatty jaqsartyp, salaǵa tikeleı sheteldik ınvestıtsııalar tartýǵa baǵyttalǵan», - dep atap ótti Senattyń jalpy otyrysynda QR Investıtsııalar jáne damý mınıstri Jeńis Qasymbek.
Belgili bolǵandaı, búginde 104 eldiń ishinde Qazaqstan geologııa salasyn memlekettik retteý boıynsha tek 74-shi orynda tur. Al jer qoınaýynyń geologııalyq tartymdylyǵy jaǵynan 45-shi orynda.
«Bul reforma álemde bolyp jatqan daǵdarys pen onyń saldarynan ınvestor tartýǵa baılanysty básekelestiktiń artýynan týyndap otyr. Uzaq merzimdi shıkizat tasymalynyń turaqtylyǵy, júrgiziletin saıasat pen saladaǵy ashyqtyq jáne rásimderdiń jeńildigi búgingi kúnniń basty talaby. Bul Kodeks jobasyn ázirleý barysynda avstralııalyq zań modelin úlgi retinde aldyq. Bundaı sheshim bir jarym jyldyq zertteý jumystary men Dúnıejúzilik bank usynysynyń nátıjesinde qabyldandy», - dep túsindirdi vedomstvo basshysy.
Aıta keteıik, álem boıynsha Avstralııanyń tájirıbesi úzdik dep sanalady. Bul - ınvestorlardyń da bergen baǵasy.
Onyń sózine qaraǵanda, «McKinsey & Company» konsaltıngtik kompanııasy esebine jáne basqa da halyqaralyq keńesshiler tujyrymyna qaraǵanda, jappaı geologııalyq barlaý tetigi iske qosylǵan jaǵdaıda, Qazaqstanda álemdik deńgeıdegi kem degende 15 ken ornyn, sondaı-aq jańa taý-ken rýdasy aımaqtaryn ashý boljanyp otyr.
«Eń bastysy, Qazaqstannyń geologııalyq barlaýda aýqymdy, sapaly ári tyńǵylyqty zerttelýi qamtamasyz etiledi. Mysaly, Qazaqstanda 1 sharshy shaqyrym esebinen barlaýǵa 7 AQSh dollary jumsalady, Avstralııada - 167 dollar, AQSh-ta - 87, Kanadada - 203 dollar qarjy baǵyttalady. ıAǵnı búginde geologııalyq barlaýǵa jumsalatyn ınvestıtsııalar eldiń qoryn toltyrýdy qamtamasyz etpeıdi», - dedi Jeńis Qasymbek.
