«Paıdaly bos ýaqyt»: Elimizde jańa joba iske qosyldy

NUR-SULTAN. QazAqparat - Jazǵy demalys kezinde balalarǵa bilim berýge arnalǵan «Paıdaly bos ýaqyt» atty jańa joba iske qosyldy. Bul týraly QazAqparat tilshisi QR Mádenıet jáne sport mınıstrliginiń baspasóz qyzmetine silteme jasap habarlaıdy.

«Mádenıet jáne sport mınıstrliginiń jańa qaıyrymdylyq jobasy karantın demalysy kezinde balalardyń oı-órisin keńeıtip, olardyń rýhanı azyq alýyna jáne bos ýaqytyn paıdaly ótkizýge zor úlesin qosady. Joba maqsaty – COVID-19 pandemııasyna qarsy kúres júrgizip jatqan medıtsınalyq qyzmetkerlerdiń otbasylaryna qoldaý kórsetý. Joba aıasynda balalarǵa óner jáne sport baǵyttary boıynsha onlaın sabaq pen sheberlik saǵaty usynylady» delingen QR Mádenıet jáne sport mınıstrliginiń baspasóz habarlamasynda.

Onlaın sabaqty belgili óner jáne sport qaıratkerleri tegin ótkizedi.

«Jańa bastamanyń basty ereksheligi – balalar qyzyǵýshylyǵy boıynsha onlaın sabaqty ózderi tańdaı alady. Óner baǵyty boıynsha: dombyra, fortepıano, skrıpka, gıtara, estradalyq án aıtý, sýret salý, akterlik sheberlik, al sport baǵyty boıynsha: erkin kúres, klassıkalyq kúres, dzıýdo, gımnastıka, boks, taekvondo sabaqtary ótedi» dep málim etti mınıstrlik.

Balalar men ata-analardyń yńǵaılylyǵy úshin joba aıasynda jańa platforma quryldy. Balalar qysqa saýalnamany toltyryp, úılestirýshilerdiń kómegimen sabaq kestesin ala alady.