Paıdaly qazbalardy zańsyz óndirýdiń jeti deregi anyqtaldy – Ónerkásip mınıstrligi
ASTANA. KAZINFORM — Paıdaly qazbalardy tájirıbelik-ónerkásiptik maqsatta alý syltaýymen jasyryn óndirý derekterine jaýapkershilik engizilip jatyr. Bul týraly QR Ónerkásip jáne qurylys vıtse-mınıstri Iran Sharhan málim etti.
- Mınıstrlik mamandary turaqty negizde jer qoınaýy boıynsha kelisimshart mindettemeleriniń oryndalýyna monıtorıng jasap keledi. Bul turǵyda óńirlerdegi ken oryndaryn tekserý jospary da bekitilgen. 2025-2026 jyldary 440-qa jýyq nysan qamtylady. Sonyń ishinde 300-ge jýyq nysandy tekserip shyqtyq. Ókinishke qaraı, paıdaly qazbalardy tájirıbelik-ónerkásiptik maqsatta alý syltaýymen jasyryn óndirý derekteri anyqtalyp jatyr. Sondyqtan Májiliste tanystyrylǵan zań jobasy aıasynda jasyryn óndirýge jaýapkershilikti kúsheıtpekpiz. Eger ınvestor tek barlaý jumystaryna ruqsat alsa, memlekettik balansqa qoımaıynsha paıdaly qazbalardy óndirýge quqyly emes. Mundaı áreketter anyqtalsa, lıtsenzııany keri qaıtarý sanktsııasyn engizemiz. Buǵan deıin bizde osyndaı tetikter bolmaǵan, - dedi I.Sharhan Parlament Májilisinde tilshiler suraǵyna jaýap bere otyryp.
Onyń aıtýynsha, baǵaly metaldardy zańsyz óndirý jáne satý áreketteri boıynsha Qylmystyq kodekste jaza qarastyrylǵan. Qazir birneshe nysan boıynsha tergeý amaldary júrip jatyr.
- Bul turǵyda jeti nysandy anyqtadyq. Osynyń bárin dáleldeý úshin taǵy da tekserý is-sharalaryn atqarý kerek. Mundaı derekter eldiń ár óńirinde anyqtalyp jatyr. Ony ǵaryshtan túsirilgen sýretterden de baıqaýǵa bolady... Sonyń arasynda altyn óndirý áreketteri de bar. Keltirilgen shyǵyn eseptelip jatyr. Atalǵan jeti nysan boıynsha materıaldar polıtsııaǵa tapsyryldy, - dedi vıtse-mınıstr.
Budan buryn habarlanǵandaı, búgin Parlament Májilisinde «Jer qoınaýy jáne jer qoınaýyn paıdalaný týraly» kodeksine ózgerister men tolyqtyrýlar engizý týraly» zań jobasy tanystyryldy.