Paıdalanylmaı jatqan jerlerge joǵary salyq engizý kerek nemese memleketke qaıtarý qajet - N. Nazarbaev
ASTANA. 22 sáýir. QazAqparat - Elordadaǵy jer telimderi árqashan da ınvestıtsııa tartýdyń mańyzdy ekonomıkalyq aktıvi bolyp tabylady. Bul týraly búgin Táýelsizdik saraıynda ótken Astanany budan ary qaraı damytýǵa arnalǵan jıynda Memleket basshysy Nursultan Nazarbaev aıtty.
«Sońǵy úsh jylda jerdi satyp alýǵa 17 mlrd. teńge jumsalǵan. Alaıda, ákimdik basqarmalarymen jer 10 esege aıyrmashylyǵy bar baǵamen satyp alynǵan. ıAǵnı, bul ákimdik deńgeıinde biryńǵaı qadam jasalmaǵanynan, jer telimderin satyp alýdyń ashyqtyǵy qamtamasyz etilmeýinen bolyp otyr. Elordalyq jer árqashan jáne ár jerde ınvestıtsııa tartýdyń mańyzdy ekonomıkalyq aktıvi»,-dedi Memleket basshysy.
Prezıdenttiń aıtýynsha, QR Bas prokýratýrasynyń málimetteri boıynsha qalada 10 myń gektardan astam aýmaqtaǵy 503 jer telimderi ıgerilmeı jatyr. «Eger shynymen de Bas prokýratýra osyndaı derekterdi keltirip jatsa, onda bul máseleni sheshý kerek»,-dedi N. Nazarbaev. Bul turǵyda Elbasy kóbi jerdi alyp, endi eshteńe istemeı jatqanyn, suranys bastalyp, baǵa óskennen keıin atalǵan azamattar qaıta satýdy kútip otyrǵandyǵyn synǵa aldy.
«Kezinde basyp qalyp, paıdalanylmaı jatqan jerlerge joǵary salyq engizý kerek nemese memleketke qaıtarý qajet. Eger aldy ma, onda qurylys jumystaryn júrgizsin»,-dep qadap aıtty Prezıdent.
Osy oraıda ol Premer-Mınıstrdiń orynbasarlary Baqytan Saǵyntaev pen Qaırat Kelimbetovke atalǵan máselege qaıta oralyp, paıdalanylmaı otyrǵan jer telimderi problemasyn sheshýdi júktedi.
