Paıdalanylmaı jatqan jerlerdi anyqtaý maqsatynda aýyl sharýashylyǵynyń jerlerine túgendeý jumystaryn júrgizý qajet
ASTANA. 14 aqpan. QazAqparat /Qanat Mámetqazyuly/ - Memleket basshysynyń Joldaýynda júktegen mindetti atqarý úshin, paıdalanylmaı jatqan jerlerdi anyqtaý maqsatynda aýyl sharýashylyǵynyń jerlerin,
ásirese Astana, Almaty qalasy men oblys ortalyqtarynyń mańyndaǵy jerlerge túgendeý jumystaryn júrgizý qajet. Búgin QR Parlamenti Májilisinde ótken Úkimet saǵatynda Jer resýrstaryn basqarý agenttiginiń tóraǵasy Ómirzaq Ózbekov osylaı málim etti.
«Respýblıkadaǵy aýyl sharýashylyǵy jerleriniń jalpy kólemi 93,4 mln. gektar bolsa, onyń ishinde 23,4 mln. gektary egistik jerlerdi quraıdy. 2010 jyldyń 1 qarashasyndaǵy jaǵdaı boıynsha elimizde 207 myń sharýa jáne fermer qojalyqtary, 6,1 myń aktsıonerlik qoǵamdar men sharýashylyq seriktestikteri, 1,3 myń óndiristik kooperatıvteri jumys isteýde. Olardyń ıelikterine barlyq aýyl sharýashylyǵy jerleriniń 98,4 paıyzy berilgen. Ókinishke qaraı, sońǵy 15 jylda aýyl sharýashylyǵy salasynda basty nazar jerdiń quqyqtyq mánisine, ıaǵnı menshik máselesi men burynǵy ujymshar, keńsharlar jerlerin taratýǵa baǵyttalyp, ondaı jerlerdiń sapaly jaǵdaıyna mán berilmedi. Ásirese jerdi tıimdi paıdalanýdyń birden bir quramdas bóligi ishki sharýashylyq jerlerge ornalastyrý jobalaryn jasaý máselesi keıinge shegerilip keldi. Mundaı jobalardy jasaýǵa bıýdjetten sońǵy 15 jylda qarajat qarastyrylmaı otyr. Bul máseleni sheshý jerdi tıimdi paıdalanýǵa óz septigin tıgizer edi», - dedi agenttik tóraǵasy.
Sonymen qatar aǵymdaǵy jylǵy Memleket basshysynyń halyqqa Joldaýyna toqtalǵan Ó. Ózbekov, paıdalanylmaı jatqan jerlerdi anyqtaý úshin aýyl sharýashylyǵynyń jerlerin, ásirese Astana, Almaty qalasy men oblys ortalyqtarynyń mańyndaǵy jerlerge túgendeý jumystaryn júrgizý qajettigin atap ótti. Bunymen qosa, túgendeý jumysynyń nátıjesi boıynsha bos jatqan jerlerdi memleketke qaıtarý jáne olardy tıimdi paıdalaný sharasyn iske asyrý ózekti bolyp otyr. «Bul rette elimizdiń jer resýrstaryn tıimdi jáne utymdy paıdalaný maqsatynda alǵashqy kezeńde jergilikti atqarýshy organdarymen birlese otyryp, bar qujattardyń negizinde aýyl shaýrashylyǵy maqsatyndaǵy jerlerdiń jaǵdaıyna saraptama jasap, bos jerlerdi aýyl sharýashylyǵy aınalymyna engizýdi anyqtaý jumystaryn josparlap otyrmyz», - dedi Ó. Ózbekov.
