Paıdalanylmaı jatqan jer telimderin qurylys salýǵa qaýqarly adamdarǵa berý qajet - Qazaqstan Prezıdenti
ASTANA. 27 qańtar. QazAqparat /Rýslan Ǵabbasov/ - Búgin Úkimettiń keńeıtilgen otyrysynda Elbasy N.Nazarbaev, paıdalanylmaı jatqan jer telimderin qurylys salýǵa qaýqarly adamdarǵa berý qajettigin aıtty.
«Qala mańynda jeke turǵyn úı qurylysyna jer telimderin bólý turǵysynda problemalar qordalanyp qaldy. Sonymen qatar, bólingen kóptegen jer ýchaskeleri ıgerilmeı qalyp jatyr»,-dedi Memleket basshysy.
Prezıdenttiń sózine qaraǵanda, jeke qurylysqa jer bólýdiń qazirgi erejeleri qurylys jasaýshynyń qarjylyq múmkindigin eskermeıdi.
«Jerdi alyp, keıbiri ony paıdalanbaıdy. Eger paıdalanbasa jer telimin úı salýǵa qaýqarly basqa bireýge berý kerek»,-dep qadap aıtty N. Nazarbaev.
Memleket basshysynyń pikirinshe, osy máseleni tek ákimder ǵana qadaǵalaı alady.
«Osy jerden muny baıqaý múmkin emes»,-dep eskertip ótti Prezıdent.
Osy oraıda Úkimet pen ákimdikterge osy másele boıynsha tıisti usynystar jasaý júkteldi.
