Paıdalanylmaı turǵan aýyl sharýashylyǵy jerlerin qaıtarý merzimi qysqartylady

NUR-SULTAN. QazAqparat – Paıdalanylmaıtyn aýyl sharýashylyǵy jerlerin qaıtarý merzimi 2-den 1 jylǵa qysqartylmaq. Bul týraly búgin Úkimet otyrysynda Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

Onyń aıtýynsha, 2019 jyldyń sońynda ǵaryshtyq monıtorıngti qoldanýdyń zańnamalyq bazasy qalyptastyryldy. 2020 jyldyń basynda paıdalanylmaıtyn aýyl sharýashylyǵy jerlerin anyqtaý boıynsha pılottyq joba elimizdiń 4 oblysynda - Aqmola, Shyǵys Qazaqstan, Qostanaı jáne Mańǵystaý oblystarynda iske qosyldy. Nátıjesinde paıdalanylmaı jatqan 8,3 mln gektar jer anyqtaldy, onyń - 7,6 mln gektary jaıylym.

«Atalǵan oblystardyń ákimdikteri paıdalanylmaıtyn jerlerdi memleket menshigine qaıtarýdy jedeldetip, olardy aýyl sharýashylyǵy aınalymyna tartýdy qamtamasyz etýi qajet. Osy jyldyń qańtarynan bastap ǵaryshtyq monıtorıng respýblıkanyń barlyq aýmaǵynda qoldanylýda. Paıdalanylmaıtyn aýyl sharýashylyǵy jerlerin qaıtarý merzimderin 2 jyldan 1 jylǵa deıin qysqartý, olardy ǵaryshtyq monıtorıng derekteri negizinde sot tártibimen qaıtarý, habarlamany qaǵaz júzinde emes elektrondyq SMS-habarlama arqyly tapsyrýǵa kóshirý boıynsha zań jobasy ázirlendi. Ol qazirgi ýaqytta Úkimetpen pysyqtalýda. Búginde Jerdi memleket menshigine qaıtarý tetikteri bar. Memleket basshysynyń tapsyrmasyn oryndaý úshin jergilikti atqarýshy organdar olardy barynsha paıdalaný sharalaryn qabyldaýy qajet», - dedi mınıstr.