Paıdalanylmaǵan 5 mln. gektar jer anyqtaldy - Q. Óskenbaev
ASTANA. QazAqparat - Aýyl sharýashylyǵy maqsatyndaǵy paıdalanylmaı otyrǵan 5 mln. gektar jer anyqtaldy. Bul týraly búgin Ortalyq kommýnıkatsııalar qyzmetindegi brıfıngte QR Ulttyq ekonomıka vıtse-mınıstri Qaıyrbek Óskenbaev málim etti.
2012-2014 jyldary aýyl sharýashylyǵy maqsatyndaǵy jerdi túgendeý júrgizilgenine toqtalǵan ol bul turǵyda 96 mıllıon gektardan astam jer qamtylyp otyrǵandyǵyn aıtty. «Jyl saıyn 30 mıllıon gektardan astam jerdiń máselesi qarastyrylady. Túgendeý barysynda sheshimdi qajet etetin birqatar júıeli máseleler anyqtaldy. Búgin Úkimet otyrysynda olardyń kóbi qaraldy», - dedi.
Onyń sózine qaraǵanda, bes mıllıon gektarǵa jýyq paıdalanylmaı otyrǵan jer telimi anyqtalyp, onyń 1,7 mln. gektary memlekettik menshikke qaıtaryldy. «2,1 mıllıon gektar jerdi paıdalaný jumystary bastaldy, 800 myń gektar boıynsha buıryq shyqqannan keıin qaıtarý merzimi bastalǵan joq, al 500 myń gektar boıynsha talap-aryz sottyń qaraýynda», - dedi vıtse-mınıstr.
«Qoldanystaǵy zańnama aıasynda paıdalanylmaı otyrǵan jerdi qaıtarý úderisi aıtarlyqtaı kúrdeli. Búgin osy másele de talqylandy. Osy oraıda zańnamalyq aktilerge qajetti ózgerister qaraldy», - dep toqtaldy Q. Óskenbaev.
