Paıdalanýǵa tyıym salynǵan ushaqtardyń tizimi ashyq jarııalanatyn bolady
ASTANA. QazAqparat - Qazaqstannyń áýe keńistigin paıdalaný talaptaryn buzýshylarǵa Azamattyq avıatsııa komıteti qatań sharalar qoldanbaq, dep habarlaıdy «QazAqparat» HAA tilshisi.
2018 jylǵy kóktemgi-jazǵy navıgatsııa maýsymy qarsańynda QR IDM Azamattyq avıatsııa komıtetiniń bastamasymen azamattyq avıatsııa máseleleri boıynsha úlken salalyq keńes ótti. QR Bas kólik prokýratýrasy atynan Almaty qalasynyń avıatsııalyq prokýrory, shaǵyn avıatsııa paıdalanýshylary, áýe kompanııalarynyń jáne áýejaılardyń 90-nan astam ókili qatysqan.
Komıtettiń avıatsııalyq jáne oqys oqıǵalardy tekserý basqarmasynyń basshysy Nurlan Jumasultanov keńes barysynda byltyr tirkelgen bes áýe oqıǵasynyń úsheýiniń tergeý qorytyndysymen tanystyrdy. Sonymen qatar, ol tekserý boıynsha qysqartylǵan esepter mindetti túrde Azamattyq avıatsııa komıtetiniń saıtynda jarııalanatynyn habardar etti.
«Óndiristik tártip máselesine, kishigirim áýe kompanııalary men jekemenshik áýe kemeleri ıeleriniń ushýdy oryndaý tártibin saqtaýǵa basty nazar aýdaryldy», - delingen habarlamada.
Al komıtettiń ushý jaramdylyǵy basqarmasynyń basshysy Tımýr ıAkýbov elimizdiń azamattyq avıatsııa flotynyń, shaǵyn avıatsııa ushaqtarynyń tehnıkalyq jaǵdaıyna toqtaldy. Sondaı-aq, ol jeńil avıatsııa ushaqtaryn sertıfıkattaý erejesine túzetýler engizý týraly jáne jalpy maqsattaǵy avıatsııa operatorlaryna erikti habarlaý júıesin jasaýdy atap ótti.
«Qatań eseptegi tehnıkalyq qujat dýblıkattarynyń berilýine tyıym salý josparlanyp otyr. Sondaı-aq barlyq azamattyq avıatsııa paıdalanýshylarynda AFTN tirkelgen baılanys júıesi mindetti túrde ornatylýy kerek. Paıdalanýǵa tyıym salynǵan áýe kemeleriniń tizimi turaqty túrde azamattyq avıatsııa komıtetiniń veb-saıtynda jarııalanyp, únemi jańartylyp otyrady. Qazaqstan Respýblıkasy Bas kólik prokýratýrasynyń tekserý nátıjeleri boıynsha usynymdarǵa erekshe nazar aýdaryldy», - delingen habarlamada.
Azamattyq avıatsııa komıteti basshylyǵy ushý erejelerindegi jáne normatıvtik qujattardaǵy josparlanyp otyrǵan negizgi ózgeristermen tanystyrdy. Komıtet tarapynan áýe keńistigin paıdalaný boıynsha zańdy buzýshylarǵa qatań sharalar qoldaný, tipti paıdalanýshynyń sertıfıkatyn qaıtaryp alý týraly joldary qarastyrylatynyn habardar etti.
Aıta ketsek, Azamattyq avıatsııa komıteti óz qyzmetin álemdegi eń ozyq bolyp tabylatyn brıtandyq úlgige sáıkestendirý protsesine kiristi. Tyń úlgi boıynsha eń basty ózgeristerdiń biri - elimizdegi avıatsııa salasynda jýyq arada ushý bıiktigin ólsheý «fýttyq» (1 fýt - 0,3048 metr - avt.) júıege kóshetin bolady.
