Paıdalanýǵa beriletin turǵyn úı sany artyp otyrǵanyna qaramastan, baspanaǵa muqtajdar azaımaı otyr

Búgin Májiliste  «Qazaqstan Respýblıkasy Qurylys jáne turǵyn úı-kommýnaldyq sharýashylyq isteri agenttiginiń 2011 jylǵy qyzmetiniń qorytyndylary jáne 2012 jylǵa arnalǵan mindetteri» degen taqyrypta ótken Úkimet saǵatynda Ekonomıkalyq reforma jáne óńirlik damý komıtetiniń tóraǵasy Seıitsultan Áıimbetov osylaı málim etti.

«Halyqtyń turǵyn úıge qol jetkizýi, ásirese balaly jas otbasylardyń, jetim balalardyń, áleýmettik álsiz toptardyń turǵyn úıge qoljetimdiligi túbegeıli jaqsaryp ketken joq. Máselen, 2011 jylǵy 1 shildedegi jaǵdaı boıynsha respýblıkadaǵy turǵyn úıge muqtaj azamattardyń sany 146 myń 859-dy quraǵan. Sonyń ishinde 16 900-y jetim balalar, 913-i Uly Otan soǵysynyń qatysýshylary men múgedekteri, 8 myńy UOS-ynyń qatysýshylary men múgedekterine teńestirilgen adamdar», - deıdi S. Áıimbetov. Onyń aıtýynsha, 2008-2010 jyldar aralyǵynda 1 myń 114 adam memlekettik turǵyn úı qorynan baspana alǵan. Bul úıge muqtaj azamattardyń barlyǵynyń 1 paıyzyn ǵana quraıdy. Olardyń 307-i jetim balalar, 672-i   UOS qatysýshylary men múgedekteri bolyp otyr. Al qazirgi ýaqytta turǵyn úı alýshylar kezegi ótken jylǵymen salystyrǵanda 5 myń 137 adamǵa kóbeıgen. «Jyl saıyn paıdalanýǵa beriletin turǵyn úı  artyp otyrǵanyna qaramastan, baspanaǵa muqtajdardyń sany  azaımaı otyr», - deıdi depýtat.