Paıdalanylmaı jatqan jaıylymdardy anyqtaý talaptary jeńildetiledi
ASTANA. KAZINFORM — Sharýa nemese fermer qojalyǵyn, aýyl sharýashylyǵy óndirisin júrgizý úshin berilgen aýyl sharýashylyǵy maqsatyndaǵy jerdi paıdalaný monıtorıngin uıymdastyrý men júrgizý qaǵıdalaryna ózgerister engiziledi.
Tıisti jobany Aýyl sharýashylyǵy mınıstrligi ázirledi.
Qujatqa saı, tórt túlik mal jaıylymnyń keminde 30%-ynda bolýy kerek. Sonda paıdalanylmaı jatqan jer dep eseptelmeıdi. Al buǵan deıin jaıylymnyń 50%-ynda úı janýarlary bolýy talap etilgen bolatyn.
— QR Jer kodeksiniń 92-baby 4-tarmaǵynyń 3) tarmaqshasyna sáıkes keltirý maqsatynda, QR 2026 jylǵy 14 shildedegi № 350-VIII «QR keıbir zańnamalyq aktilerine memlekettik basqarý jáne jergilikti ózin-ózi basqarý máseleleri boıynsha ózgerister men tolyqtyrýlar engizý týraly» Zańymen jaıylymdardyń jalpy alańyna shaqqandaǵy shekti ruqsat etilgen júkteme normasynyń elý paıyzynan otyz paıyzyna deıin aýyl sharýashylyǵy janýarlarynyń bolýy jónindegi talapqa ózgerister engizildi, bul jaıylymdardyń paıdalanylmaýyn aıqyndaý úshin qoldanylady, — delingen qujatta.
Sonymen birge, ózgerister sharýa nemese fermer qojalyǵyn, aýyl sharýashylyǵy óndirisin júrgizý úshin berilgen aýyl sharýashylyǵy maqsatyndaǵy jerdi paıdalaný monıtorıngin uıymdastyrý men júrgizýdi qamtamasyz etýge baǵyttalǵan.
Joba qoǵamdyq talqylaý úshin «Ashyq NQA» portalyna 15 qyrkúıekke deıin júkteldi.
Aıta keteıik, buǵan deıin elimizde jaıylym tapshylyǵy 3,5 mln gektarǵa qysqarǵanyn jazǵanbyz.
