Paıdalanylǵanyna 25 jyldan asqan lıftilerdi aýystyrý jáne jóndeý jol kartasy ázirlenedi

ASTANA. KAZINFORM — Paıdalanylǵanyna 25 jyldan asqan lıftilerdi aýystyrý jáne kúrdeli jóndeý jol kartasy ázirlenedi. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- «Azamattyq qorǵaý týraly» Qazaqstan Respýblıkasynyń Zańy 1-babynyń 32-1) tarmaqshasyna sáıkes lıftiler qaýipti tehnıkalyq qurylǵylarǵa jatqyzylǵan. Lıftilerdi paıdalanýǵa berýdi belgilengen normatıvter boıynsha komıssııa júzege asyrady, bul rette lıftiler mindetti esepke alynýǵa jáne tekserilýge jatady. Atalǵan tásilder Júk kóterý tetikterin paıdalaný kezinde ónerkásiptik qaýipsizdikti qamtamasyz etý qaǵıdalary aıasynda iske asyrylady, - dedi Úkimet basshysy.

Premer-mınıstrdiń atap ótýinshe, turǵyn úı zańnamasynyń normalaryna sáıkes, kondomınıým obektisiniń ortaq múlkin, onyń ishinde lıftilerdi aýystyrý ne kúrdeli jóndeý páterler men turǵyn emes úı-jaılar ıeleriniń kópshilik daýsynyń hattamalyq sheshimi negizinde júrgiziledi.

Turǵyn úı zańnamasy sheńberinde respýblıkada kóppáterli turǵyn úılerge kúrdeli jóndeý júrgizý, onyń ishinde menshik ıeleriniń kórsetilgen sheshimi negizinde lıftilerdi aýystyrý jónindegi baǵdarlama qoldanylady. 

- Osyǵan baılanysty Ónerkásip jáne qurylys mınıstrligne Astana, Almaty, Shymkent qalalarynyń jáne oblystardyń ákimdikterimen birlesip, qarjylandyrý merzimderi men kózderin kórsete otyryp, apatty jáne 25 jyldan astam paıdalanýdaǵy lıftilerdi aýystyrý jáne kúrdeli jóndeý boıynsha jol kartalaryn ázirleý jáne bekitý tapsyryldy, dedi Oljas Bektenov.

Buǵan deıin elimizde 4 myńnan astam lıft aýystyrýdy qajet etetinin jazǵan edik.