Paıdakúnemder úshin maıshelpekke aınalǵan: Prezıdent «Altyn orda» bazarynda tártip ornatýdy tapsyrdy

NUR-SULTAN. QazAqparat – Prezıdent Qasym-Jomart Toqaev Úkimettiń keńeıtilgen otyrysynda eldegi bazarlardyń jumysyn zań aıasynda retteýdi tapsyrdy, dep habarlaıdy QazAqparat tilshisi.

«Saýda-sattyqtaǵy tıimsiz deldaldyqqa toqtaý salatyn kez keldi. Mysaly, 3 mln adam turatyn Almaty qalasy men onyń tóńiregindegi eldi meken turǵyndary tutyný taýarlaryn kóbine «Altyn orda» bazarynan alady. Almaty oblysy men Almaty qalasynyń ákimderine Úkimetpen birlesip, bazarda tártip ornatýdy tapsyramyn. Bul jer paıdakúnemder úshin naǵyz maıshelpekke aınalǵan. Buǵan Alamtydaǵy qańtar oqııǵasy kezinde anyq kóz jetkizdik», -dedi Memleket basshysy.

Ol bul iske qajet bolǵan jaǵdaıda quqyq qorǵaý oryndaryn aralastyrýǵa bolatynyn aıtty.

«Bul basqa óńirlerge de qatysty másele. Qajet bolsa, osy jumysqa quqyq qorǵaý organdary atsalyssyn», - degen Prezıdent atalmysh máseleni retteýge eki aı ýaqyt beriletinin eskertti.