Paıdakúnem laýazymdy tulǵalarǵa ótkizilgen memlekettik satyp alýlardy tekserý qalta toltyrý ádisine aınalǵan - M.Jumanbaı
ASTANA. 13 sáýir. QazAqparat /Marlan Jıembaı/ - Paıdakúnem laýazymdy tulǵalar úshin ótkizilgen memlekettik satyp alýlardy tekserý baıý maqsatynda bızneske qysym jasaýdyń taǵy bir joly bolyp otyr.
Bul týraly búgin elordada QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
Onyń atap ótýinshe, Atyraý oblysynda qyzmet babyn paıdalanyp alaıaqtyq jasaǵany úshin oblystyq qarjylyq baqylaý ınspektsııasynyń mamany Erǵalıev múlki tárkilenip, 5 jylǵa bas bostandyǵynan aıyryldy. Ol Qyzylqoǵa aýdanynyń Qarakól aýylyndaǵy orta mektepti kúrdeli jóndeýdiń tekserý nátıjesi boıynsha oń qorytyndy berýi úshin «SnabOılStroı» JShS ókilinen 500 myń teńge jáne 10 myń AQSh dollaryn alý ústinde ustalǵan.
Sondaı-aq Almaty qalasynda oblystyq qarjylyq baqylaý ınspektsııasynyń bas mamany Esqazıev 3 jyl 6 aıǵa bas bostandyǵynan aıyryldy. Ol bopsalaý jolymen «Izobılıe» JShS dırektorynan atalǵan kásiporyndy tekserý kezinde oń sheshim shyǵarý úshin 1700 AQSh dollaryn para retinde alǵan.
