Pavlodarlyqtardan jemqorlyqqa qatysty 40-tan astam shaǵym túsken
«Bıylǵy jyldyń basynan beri oblys turǵyndarynan 40-tan astam shaǵym tústi. Top músheleri men departament olardy birlese qarap shyǵyp, sáıkes sheshim qabyldady», - dedi Pavlodar oblysy Memlekettik qyzmet isteri jáne sybaılas jemqorlyqqa qarsy is-qımyl agenttiginiń departamentinde.
Kartanyń tıimdi júzege asyrylýy úshin oblystyń barlyq qalalary men aýdandarynda jergilikti arnaıy monıtorıntik toptar quryldy. Olardyń quramyna mundaı jaǵdaılarǵa beıjaı qaramaıtyn turǵyndar, qoǵamdyq uıym belsendileri kirdi.
«Qoǵamdyq baqylaý kartasy» jobasynyń maqsaty - memlekettik organdardy jáne úshinshi nemese tórtinshi deńgeıli bıýdjetti baqylaý, ıaǵnı alys aýdandar men aýyldyq okrýgterdiń turǵyndary aýdandyq monıtorıngtik toptar, áleýmettik jeliler nemese qurylǵan kol-ortalyq arqyly qandaı da zańbuzýshylyqtar týraly habar bere alady», - dedi agenttik ókili.
Qoǵamdyq monıtorıngke mektepter men balabaqshalardaǵy zańsyz aqsha jınaý derekterin, áleýmettik nysandar qurylysynyń barysy, memlekettik qyzmetkerlerdiń qyzmettik etıkany buzýy, qyzmettegi laýazymdy asyra paıdalaný, qyzmettik avtokólikterdi jeke maqsatta qoldaný jáne t.b. derekter jatqyzyldy.
«Mysaly, mamyr aıynda Baıanaýyl aýdanyna qarasty Maıqaıyń aýyldyq okrýginiń «Ushqyn» balabaqshasynan zańsyz túrde aqsha jınaýǵa qatysty shaǵym tústi. Mekemede aıyppuldy tóleý úshin bir aı boıy qyzmetkerlerden aqsha talap etilgen. Tólemegen jaǵdaıda basshylyq qyzmetkerlerin jumystan shyǵarýmen qorqytqan. Nátıjesinde aqshany jınap tynǵan»- dedi departament ókili.
Baıanaýyl aýdanynyń jáne Pavlodar oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl agenttigi departamentiniń arnaıy monıtorıngtik toby profılaktıkalyq jumystardy júrgizgennen keıin jınalǵan aqsha balabaqsha ujymyna qaıtarylǵan.
Al 18 maýsymda arnaıy monıtorıngtik topqa jedel járdem kóligin maqsatsyz paıdalanǵany týraly shaǵym túsken. Kólikke Pavlodardyń kóterme saýda dúkeninen azyq-túlik tıelgen.
«Pavlodar oblysy Densaýlyq saqtaý basqarmasynyń aqparatyna sáıkes, kólik Aqtoǵaı ortalyq aýdandyq aýrýhanasyna tıesili bolyp shyqty. Aqtoǵaı aýdanynyń arnaıy monıtorıngtik toby Aqtoǵaı ortalyq aýdandyq aýrýhanasynyń bas dárigerimen profılaktıkalyq áńgime júrgizip qaıtty», - dedi Memlekettik qyzmet isteri jáne sybaılas jemqorlyqqa qarsy is-qımyl agenttigi departamentiniń qyzmetkerleri.