Pavlodarlyqtar jedel járdemdi Telegram arqyly shaqyra alady

PAVLODAR. QazAqparat – Pavlodar oblysynyń turǵyndary 103 qyzmetin Telegram arqyly shaqyra alady, dep habarlaıdy QazAqparat Pavlodarnews.kz saıtyna silteme jasap.

Oblystyq jedel járdem stantsııasy baspasóz qyzmetiniń málimetinshe, pavlodarlyqtar alǵashqy medıtsınalyq kómekti Telegram-bot arqyly ala alady.

Pavlodar oblysynda jedel járdemdi Telegram messendjeri arqyly shaqyrý fýnktsııasy úsh aı buryn iske qosylǵan. Alaıda, messendjerdi paıdalanatyndar áli de az. Alǵashqy kómekti 103 qyzmetine qońyraý shalý arqyly shaqyratyndar kóp.
Búgingi tańda 103 telefon jelisine júkteme aıtarlyqtaı artqan. Eger buryn táýligine 500-600 qońyraý tússe, búginde olardyń sany keı ýaqytta 700-den asady. Sondyqtan oblystyq jedel járdem stantsııasynda Telegram arqyly kómek suraý múmkindigi týraly eske salady.
Ol úshin https://t.me/pvl_103_bot messendjerine jazylý jetkilikti. «Jedel járdem shaqyrý» batyrmasyn basý arqyly paıdalanýshy nusqaýlyqqa sáıkes jaraqattanýdy nemese aýyrýdy sıpattaýy, sondaı-aq naýqastyń ornalasqan jerin barynsha dál kórsetýi tıis.
Messendjer arqyly berilgen ótinim Pavlodar oblysynyń jedel járdem stantsııasynyń biryńǵaı koll-ortalyǵynda óńdeledi. Aldymen dıspetcher qońyraýdyń shuǵyldyǵyn anyqtaýy kerek. Shuǵyldyqtyń tórt sanatynyń árqaısysynyń ózindik ýaqyty bar.
Mysaly, adamnyń ómirine naqty qaýip tóngen kezde І sanat boıynsha shaqyrý 15 mınýt ishinde pysyqtalýy tıis. Jedeldiktiń IV tórtinshi sanaty boıynsha shaqyrýlar emhanalarǵa beriledi jáne olarǵa mobıldi brıgadalar qyzmet kórsetedi.
Ótinimniń jumysqa qabyldanǵanyn ne qabyldanbaǵanyn «júginý kúıin tekserý» batyrmasyn basý arqyly kórýge bolady.