Pavlodarlyqtar Metallýrgter kúnin erekshe atap ótti
ASTANA. QazAqparat - Pavlodarda Ertis Promenade sahnasynda ótken merekelik keshke 50 adam jınaldy. Ortalyq jaǵalaýdaǵy metallýrgterdiń qurmetine arnalǵan kontsert ásem bımen bastaldy, dep habarlaıdy pavlodarnews.kz.
Bı barysynda ártister alıýmınııdiń qalaı daıyndalatynyn kórsetti. Pavlodar oblysynyń ákimi Bolat Baqaýov «qanatty metall» daıyndalatyn glınozem Ertis óńirinen reseılik naryqqa jetkiziletinin jáne alıýmınııdiń ózi Eýropa men Azııada suranysqa ıe ekenin atap ótti. - Búginde alıýmınıı klasteri elimizdiń metallýrgııa salasynyń negizi bolyp otyr, - dedi óńir basshysy. - Men «Qazaqstan alıýmınııi» AQ jáne «Qazaqstan elektrolız zaýyty» AQ-da eńbek etetin pavlodarlyq metallýrgterdiń prezıdentimiz Nursultan Nazarbaevtyń «Qazaqstanda jasalǵan» markasy boıynsha shyǵarylǵan ónimniń árdaıym suranysqa ıe jáne joǵary sapaly bolsyn degen tapsyrmasyn oryndaýǵa bar kúshin salatyndaryna senemin».
Oblys ákimi qos kásiporynnyń úzdik qyzmetkerlerine alǵys hattar men maqtaý qaǵazdaryn tabystady. Sonymen qatar, ózge de ondaǵan metallýrgter ERG korporatsııasynyń arnaıy marapattaryna ıe boldy. - Jyl basynan beri 750 myń tonna glınozem, 2,5 mıllıon tonna boksıt jáne bir mıllıon tonna áktas óndirilip, 127 myń tonnadan astam bastapqy alıýmınıı shyǵaryldy, - dedi «Qazaqstan alıýmınııi» AQ basshysy. - Munyń bári - naǵyz kásibılerdiń mańdaı ter, kúsh-jigerlerimen atqarǵan eńbekteriniń jemisi. Biz ortaq isimizge ár adamnyń qosqan úlesin joǵary baǵalap, zamanaýı jáne qaýipsiz eńbek jaǵdaıymen qamtamasyz etýge tyrysamyz.
Pavlodardyń basty alańyna jınalǵandar úshin qazaqstandyq ánshi Luina men reseılik pop-oryndaýshy Dıma Bılan óner kórsetti. Kórermender juldyzdardyń ánin qosyla shyrqap, olarmen birge sýretke tústi.
