Pavlodarlyqtar medıtsınalyq saqtandyrý úshin 10,2 mlrd teńge aýdardy
«Áleýmettik medıtsınalyq saqtandyrý qory» KEAQ Pavlodar oblysy boıynsha fılıalynyń dırektory Aıdar Seıitqazınovtyń aıtýynsha, Pavlodar oblysynyń jumys berýshileri men jeke kásipkerleri mindetti áleýmettik medıtsınalyq saqtandyrý boıynsha 10,2 mlrd teńge tóledi. 2017 jylǵy 1 shildeden beri barlyq jumys berýshiler óz jumyskerleri úshin qarjy aýdaryp keledi. Jeke kásipkerler de qaramaǵynda jumyskerleri bolsa tólem jasaıdy. Jınaqtalǵan qarjy Ulttyq bankte saqtalady. Qarjy mindetti áleýmettik medıtsınalyq saqtandyrý sheńberinde medıtsınalyq qyzmetter paketin qarjylandyrýǵa baǵyttalady.
«Óńirge qarasty qalalar arasynda Pavlodar qalasy kósh bastap tur. Aýdandar arasynda Baıanaýyl, Sharbaqty jáne Pavlodar aýdandary úzdikter qatarynda. Qazirgi kúnge deıin medıtsınalyq saqtandyrý qoryna 224 mlrd teńge jarna túsken», - deıdi Aıdar Seıitqazınov. «Onyń 215 mlrd teńgesi jumys berýshilerdiń aýdarymdary, al 8,8 mlrd teńge jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili». Sondaı-aq, 2019 jyldyń qańtarynan bastap ózin-ózi jumyspen qamtyǵan turǵyndar biryńǵaı jıyntyq tólemin tóleı alady. Oǵan tórt salyq túri – jeke tabys salyǵy, mindetti zeınetaqy jarnasy, áleýmettik saqtandyrý jarnasy jáne áleýmettik medıtsınalyq saqtandyrý Qoryna tólenetin jarna kiredi. Biryńǵaı jıyntyq tólem qaramaǵyna jumysker almaı, tabys tabý maqsatynda jeke tulǵalarǵa qyzmet kórsetetin azamattar arnalǵan. Biryńǵaı jıyntyq tólem aı saıyn tólenip, respýblıkalyq jáne oblystyq deńgeıdegi qala turǵyndary úshin 1 AEK (2525 teńge), ózge eldi mekenderdiń turǵyndary úshin (aýdan ortalyqtary, aýyldar, kentter) 0,5 AEK (1263 teńge).
2020 jyldyń 1 qańtarynan bastap aýdarymdar men tólemderdi jeke kásipkerler, sharýa qojalyǵy basshylary, jeke tájirıbemen aınalysatyn tulǵalar, jalǵa jumys isteýshiler, erikti tólemshiler jáne memleket jeńildik sanatyna kiretin azamattar úshin tólem jasaıdy.