Pavlodarlyqtar Májilis depýtattyǵyna kandıdattardy tańdady

PAVLODAR. QazAqparat - Pavlodar oblysy boıynsha «Nur Otan» partııasy fılıalynyń kezekten tys XXX konferentsııasynda fılıal tóraǵasy Ábilqaıyr Sqaqovtyń qatysýymen QR Parlamenti Májilisi men oblystyq máslıhat depýtattyǵyna kandıdattardyń partııalyq tizimi anyqtaldy, dep habarlaıdy QazAqparat Ravlodarnews.kz saıtyna silteme jasap.

«Nur Otan» partııasy Pavlodar oblystyq fılıalynyń baspasóz qyzmetiniń málimetinshe, daýys berý Primaries.kz saıtynda elektrondy júıe boıynsha júrgizildi.
Búgin praımerızdiń birinshi kezeńinde eń kóp daýys jınaǵan 16 úmitker Parlamenttiń tómengi palatasyndaǵy oryndar úshin baq synady. Shaǵyn jáne orta bıznes, densaýlyq saqtaý, bilim berý jáne ózge de salany qarastyrǵan jańa tulǵalar qosyldy. Oblystyń barlyq turǵyndary tikeleı efırde tamashalaı alatyn qoǵamdyq pikirtalastar nátıjesinde 112 konferentsııa delegaty tańdaǵan kandıdattaryna onlaın rejıminde óz daýystaryn berdi. Oblys turǵyndary qatysýshylar oryndaýlaryn tikeleı efırde tamashalady.
Konferentsııaǵa daıyndyq kezinde praımerızge qatysýshylar partııanyń Pavlodar oblysyndaǵy saılaýaldy baǵdarlamasynyń negizgi baǵyttaryna súıendi.
- Praımerız ótkizý barysynda 2000-nan astam tapsyrys tústi. Onyń 80 paıyzy - óńir turǵyndarynyń eskertýleri men usynystary. Óńirdiń 7 negizgi damý baǵyty belgilendi. Bul - ekonomıkalyq turaqty óńir. Jaıly óńir. Áleýmettik baǵdarlanǵan óńir. Jastarǵa arnalǵan óńir. Tarıhy men mádenıeti baı óńir. Ashyq jáne esep beretin organdar. Qaýipsiz óńir. Búgin azamattar naqty usynystar men bastamalardy kútedi. Partııa barlyǵyna ashyq. Konstrýktıvti usynystaryńyzdy qoldaýǵa daıynbyz. Bizdiń barlyǵymyzdy ortaq maqsat biriktiredi. Bul - ár qazaqstandyqtyń ómir súrý deńgeıin arttyrý. Sondyqtan barlyq usynystar óte mańyzdy, - dep atap ótti oblys ákimi Ábilqaıyr Sqaqov.

Búgingi pikirsaıys barysynda úmitkerler problemalardy sheshý maqsatynda óz kózqarastaryn usyndy.
- Men elimniń jaǵdaıyna beı-jáı qaraı almaımyn. Ol úshin búkil ómirlik tájirıbemdi jáne bilimimdi qoǵam ıgiligi úshin qoldanýǵa daıynmyn. Qoldaý kórsetken partııalastaryma alǵys aıtamyn. Men olardyń senimderin aqtaýǵa tyrysamyn, óıtkeni bizdiń baǵdarlama otandastarymnyń nusqaýlarynan, olardyń tilekteri men úmitterinen quralǵan, - dedi Gúlnár Qaıdarova.

Daýys berýdiń alǵashqy tórt jetekshisi Parlament Májilisi depýtattaryn saılaýǵa partııalyq tizimge usynyldy. Olardyń arasynda Danııar Aıtyshev bar.
- Men jastardyń, ásirese aýyldyq jerlerde turatyndardyń múddelerin qorǵaımyn. Meniń aýylda jumys jasaǵanyma 4 jyl boldy. Jastarǵa arnalǵan jataqhanada turamyn, aýyldyń jáne jastardyń máselelerin jaqsy bilemin. Eń aldymen, men aýyl jastaryn eńbek naryǵynda olardyń básekege qabilettiligin arttyra otyryp, olardy jumyspen qamtý máselesin kóteremin, - dedi úmitker Danııar Aıtyshev.

Sondaı-aq, praımerızge qatysýshylardyń ishinen eń joǵary reıtıngi bar, Pavlodar oblystyq máslıhatyna 51 úmitker ishinen tizim quryldy. Sońǵy sheshim HH partııa sezinde qabyldanady.
Partııaishilik irikteý nátıjeleri boıynsha «Nur Otan» partııasynan oblystyq máslıhat depýtattarynyń quramy 67%-ǵa jańartylady.
- Buǵan deıin aıtylǵandaı, praımerız bizdiń depýtat kandıdattaryna jańa serpin berdi. Ortasha jas kem degende on jylǵa kemidi - 44 jasty quraıdy. Sondaı-aq, partııa myqty jáne básekege qabiletti tulǵalarmen tolyqty. Quramda sapaly jobany júzege asyratyn názik jandylar men jastar bar, - dep atap ótti «Nur Otan» partııasy Pavlodar oblystyq fılıaly tóraǵasynyń birinshi orynbasary Ilıa Terenchenko.

Partııalyq tizimge daýys berý qorytyndysy boıynsha QR Parlament Májilisine Anatolıı Boıchın – 95 daýys, Gúlnar Qaıdarova – 82 daýys, Janat Shuǵaev – 73 daýys, Danııar Aıtyshev - 58 daýyspen tizimde kósh bastady.
Kandıdattardyń partııalyq tizimi quryldy.