Pavlodarlyqtar Mánshúk Mámetovanyń 95 jyldyǵyna oraı reseılik Nevel qalasyna bardy
Mereıtoıdy toılaýǵa Pavlodar oblysynyń delegatsııasy da bardy. S. Toraıǵyrov atyndaǵy Pavlodar memlekettik ýnıversıtetiniń aǵa oqytýshysy Aslan Ázerbaevtyń aıtýynsha, ýnıversıtettiń Qazaqstan tarıhy kafedrasynyń stýdentteri 2009 jyldan beri «Estelik vahtasyna» belsene qatysyp keledi. «Qazaqstandyq jaýyngerler jan pıda ete qorǵaǵan Nevel qalasyn óz kózimmen kórýdi armandaýshy edim. Munda quramynda Mánshúk Mámetova, Ibraıym Súleımenov, Ábilqaıyr Baımoldın syndy qazaqtyń qaharman batyrlary bolǵan júzinshi qazaq atqyshtar brıgadasyn zor qurmetpen eske alady», - deıdi ol.
1943 jyly Mánshúk Mámetovanyń batalonyna jaýdyń qarsy shabýylyn toıtarýǵa buıryq beriledi. Taban tiresken aıqasta jas pýlemetshi aýyr jaralanǵanyna qaramastan, jaýǵa berilmeı, oqty qarsha boratty. Jaýdyń 70-ten astam áskerin jer jastandyrǵan Mánshúk dushpan áskeriniń shabýylyn toıtarýǵa orasan úles qosty.
«Gvozdık» izdeý jasaǵy komandıriniń orynbasary Ivan Malahov Neveldegi mereıtoılyq kezdesý jaıynda áńgimeleı kele: «Bizdiń batyrlarymyz ortaq, Nevel úshin qazaqtar ózgelerden erekshe jaqyn. Olar bul qalany qorǵap, azat etýge kómektesti, biz máńgilik baýyrlastarmyz», - dedi.
